एजेन्सी – स्पेनिस क्लब रियल म्याड्रिडले घरेलु मैदान सान्टियागो बर्नाबेउमा च्याम्पियन्स लिग पहिलो पटक खेलिरहेको युनियन बर्लिनमाथि संघर्षपूर्ण जित निकालेको छ ।

उच्च लयमा रहेका मिडफिल्डर जुड बेलिङघमको इन्जुरी टाइम गोलको मदतले रियल १-० ले विजयी भएको हो । बेलिङघम यस समरमा क्लबमा आबद्ध भएदेखि म्याड्रिडका लागि ६ खेलमा छैटौं गोल गर्न सफल रहे ।

उनले इन्ज्युरी समयको चौथो मिनेटमा फेडेरिको भाल्भर्डेको प्रहार उनको खुट्टामा आएपछि बललाई सजिलै जालीको दिशा देखाएका थिए । म्याड्रिडले दोस्रो हाफमा दुई पटक पोस्टमा प्रहार गरेको थियो । पहिलो पटक च्याम्पिंस लिगमा स्थान बनाएको बर्लिन भने निराश भएर घर फर्कन बाध्य रहयो ।

खेलको सुरुवातमा रियलका फरवार्ड होसेलुको हेडर पोस्टको केहि माथिबाट बाहिरिएको थियो । त्यो बाहेक म्याड्रिडले पहिलो हाफमा अरु अवसर सिर्जना गर्न सकेन । बर्लिनले पनि म्याड्रिडको डिफेन्स माथि समस्या उत्पन्न गराउन सकेन ।

दोस्रो हाफमा भनी म्याड्रिडले सुधारिएको प्रदर्शन गर्न सफल भयो । ५१औ मिनेटमा होसेलुको एक्रोबेटिक प्रहार पोस्टमा लागेर बाहिरियो । नौ मिनेट पश्चात युनियन किपर फ्रेडरिक रोनोले जोसेलुको हेडरलाई बचाएपछि बल क्रसबारमा ठोक्किन पुग्यो । गोलरक्षक रोनोले रोड्रिगोको र मोड्रिचको प्रहारलाई समेत विफल पारेका थिए । तर बर्लिनले खेलको अन्तिम समयमा म्याड्रिडले पाएको कर्नरमा गोल गर्न बाट रोक्न भने सकेन ।

पाँच वर्षअघि जर्मन फुटबलको दोस्रो श्रेणीमा खेलिरहेको युनियनले च्याम्पियन्स लिगको अर्को खेलमा आफ्नो स्पोर्टिङ ब्रागा विरुद्ध आफ्नो घरेलु मैदानमा खेल्दा पुनरागमन गर्ने आशा राख्नेछ । म्याड्रिडले सोहि दिन नापोलीको सामना गर्नेछ ।