काठमाडौं (हाम्रो खेलकुद)– राष्ट्रिय फुटबल टोलीका गोलकिपर विशाल श्रेष्ठ नेपाल सुपर लिग (एनएसएल) मा एफसी चितवनको मार्की खेलाडीको रुपमा अनुबन्ध भएका छन् ।

गेम वान प्राली अन्तर्गत रहेको एफसी चितवन क्लबका अध्यक्ष सचिन ढकाल र गोलकिपर विशालबीच मंगलबार आबद्धता पत्रमा हस्ताक्षर गरेको क्लबले प्रेस विज्ञप्तीमार्फत जानकारी दिएको छ। छन् । एनएसएलको दोस्रो संस्करण मंसिर ८ गतेबाट सुरु हुँदैछ ।

विशाल पहिलो संस्करणमा बुटवल लुम्बिनी एफसीबाट खेलेका थिए । चितवनले पहिलो संस्करणको एनएसएलमा भरत खवासलाई मार्की खेलाडीको रुपमा अनुबन्ध गरेको थियो । राष्ट्रिय टोलीबाट कम मौका पाएका विशाल घरेलु फुटबलमा भने सफल गोलकिपरमा पर्दछन् ।

एक दशक भन्दा बढी नेपाल राष्ट्रिय टोलीमा रहेपनि विशालले डेब्यु भने सन् २०२१ मा भारत विरुद्धको खेलमा गरेका थिउ । किरण चेम्जोङ लगातार पहिलो रोजाईमा खेलेपछि विशालले डेब्यूको लागि लामो प्रतीक्षा गर्नु परेको थियो । उनले सहिद स्मारक ए डिभिजन लिग मछिन्द्रबाट खेल्ने गर्दछन् ।

२०७८ मा मछिन्द्रले ए डिभिजनको उपाधि जित्दा विशालले प्रतियोगिताभर २ गोलको मात्र सामना गरेका थिए । उनले ४ पटक ए डिभिजनको उपाधि जितेका छन् । दुई पटक मनाङ मस्र्याङ्दी क्लबबाट लिग जितेका विशाल मछिन्द्र दुई पटक च्याम्पियन बन्दा उनी टोलीको पहिलो रोजाईका गोलकिपर रहे ।

चितवनले पहिलो संस्करणमा जित विहिन रहँदै एनएसएलको अन्त्य गरेका थियो । सात टोली सम्मिलित पहिलो संस्करणमा चितवनले ६ खेलमा २ बराबरी सहित २ अंक मात्र जोडेको थियो । चितवन सहित धनगढी र बुटवलको मार्की खेलाडी सार्वजनिक गरिसकेका छन् ।

धनगढीले आशिष चौधरी र बुटवलले एरिक विष्टलाई अनुबन्ध गरेका छन् । एनएसएलको अक्सन शनिबार काठमाडौंमा हुदैछ । यसपटक ९ टोलीले एनएसएल खेल्दैछन् । विराटनगर एफसीले भने यसपटक नखेल्ने भएको हो । ३ टोली पहिलो पटक एनएसएल खेल्दैछन् ।