काठमाडौं (हाम्रो खेलकुद)– साफ यु १९ च्याम्पियनसिपको उपाधिमा भारतले ह्याट्रिक गरेको छ । दशरथ रंगशालामा शनिबार पाकिस्तानलाई ३–० ले हराउँदै भारत लगातार तेस्रो पटक च्याम्पियन बनेको हो ।

यसअघि सन् २०१९ र २०२२ मा पनि भारत च्याम्पियन बनेको थियो । २०१५ को पहिलो र २०१७ को दोस्रो संस्करणमा नेपालले यु १९ को उपाधि जितेको थियो ।

भारतलाई जित दिलाउन सुरवाती दुबै गोल परिवर्तित खेलाडी मागेथाङ किपगेनले गरेका थिए । अर्को गोल गोगोसर गोएरीले गरेका थिए । पहिलो गोल ६४ औं मिनेटमा गरेका मागेथाङले अर्को गोल ८५ औं मिनेटमा फ्रिकिकमार्फत गरेका थिए । गोगसरले इन्जुरी समयमा तेस्रो गोल गरेका थिए । ६ मिनेट इन्जुरी समयको १ मिनेट बाँकी रहँदा उनले गोल गरेका थिए ।

पाकिस्तानको यु १९ को पहिलो सहभागितामा नै फाइनल पुग्न सफल भएको थियो । सेमिफाइनलमा भारत र पाकिस्तान दुबै टोली टाईब्रेकरमा जित निकाल्दै फाइनलमा स्थान बनाएका थिए । भारतले घरेलु टोली नेपाल र पाकिस्तानले भुटानलाई हराउदै उपाधि भिडन्त तय गरेका थिए ।

भारतले समूह चरणमा बंगलादेश माथि ३–० जित हासिल गरेको थियो भने भुटानलाई २–१ ले हराएको थियो । पाकिस्तानले भने पहिलो खेलमा घरेलु टोली नेपाललाई १–० ले हराउँदा दोस्रो खेलमा भने माल्दिभ्स सँग १–१ गोलको बराबरीमा रोकिएको थियो । प्रतियोगितामा श्रीलंका बाहेक दक्षिण एसियाका ६ टोलीको सहभागिता थियो । बंगलादेश र माल्दिभ्स समूह चरणबाट बाहिरिएका थिए ।