नर्थक्यारोलिना अमेरिका (हाम्रो खेलकुद)– अमेरिकाको नर्थ क्यारोलिनामा दशै कप फुटबल प्रतियोगिता (दशै सकर प्रतियोगिता २०२३) सुरु भएको छ ।

नर्थ क्यारोलिना राज्यको राजधानी राएले वरपरको क्षेत्रमा बसोबास गर्ने स्थानिय नेपाली समुदायका विभिन्न ६ टोलीले प्रतियोगितामा भाग लिइरहेका छन् । प्रतियोगिता गत सेप्टेम्बर १६ बाट सुरु भएको हो । हरेक साताको शनिबार हुने प्रतियोगिता लिग कम नकआउटका आधारमा स्थानिय एपेक्स नेचरल पार्कको फुटबल मैदानमा संचालन हुन्छ ।

शनिबारको पहिलो खेलमा टिम एल्लोले टिम ह्वाइटलाई १–० ले हराएको थियो । श्याम कडेलको गोलमा एल्लो विजयी भएको हो । त्यस्तै दोस्रो खेलमा टिम रेडले टिम ब्ल्याकलाई ५–२ ले हरायो । रेडका लागि सन्जिब खनालले २, गौरव शर्मा, प्रदिन मगर र योगेश पराजुलीले समान १ गोल गरे । ब्ल्याकका लागि दुबै गोल अदिप कार्कीले गरे ।

टिम रेड, एल्लो, ग्रिन र ब्लु प्रतियोगिताको सेमिफाइनलमा पुगेका छन् । सेमिफाइनल अक्टुबर ७ र फाइनल अक्टुबर १४ मा हुनेछ ।

हरेक वर्ष दशैको अवसरमा संचालन हुने प्रतियोगतामा यसपटक एनआरएनए नर्थ क्यारोलिना च्याप्टरको सहकार्य एवं स्थानिय ड्रिम होम रियल्टी, डिलिजेन्ट ट्राभल, युनिसफ्ट सोलोसन लगायतका नेपाली व्यवसायिक संस्थाहरु तथा व्यक्तिगत रुपमा भरत सुवेदी, विकास सापकोटा, उत्तम निरौलाको सहयोग रहेको बताइएको छ ।