एजेन्सी – इंग्लिस प्रिमियर लिगमा शनिबार म्यानचेस्टर युनाइटेडले ब्रेन्टफर्डमाथि २–१ को नाटकीय पुनरागमन जित निकालेको छ ।

१ गोलले पछि परेको अवस्थामा इन्ज्युरी समयमा २ गोल फर्काउँदै युनाइटेड जित हासिलल गर्न सफल भएको हो । दुबै गोल ८७ औं मिनेटमा मैदान प्रवेश गरेका स्कट मकटोमिनेले गरेका हुन् ।

२६औं मिनेट माथियास येन्सनले गोल गर्दै ब्रेन्टफर्डलाई अग्रता दिलाएका थिए । लगातार दुई खेलमा हार बेहोरेको युनाइटेड ब्रेन्टफर्ड पनि हारको नजिक पुगेर जित निकाल्न सफल भएको थियो । निर्धारित ९० मिनेटमा गोल फर्काउन नसक्दा युनाइटेडका समर्थक निराश भएका थिए ।

अन्त्यतिर मैदाान प्रवेश गर्ने मौका पाएका मकटोमिनेले ४ मिनेटको फरकमा २ गोल गर्दै टोलीका लागि सनसनीपूर्ण जित निकाले । उनले इन्ज्युरी समयको तेस्रो र सातौं मिनेटमा गोल गर्दै नतिजा उल्टाएका थिए । जितपछि युनाइटेड ८ खेलमा १२ अंक सहित नवौं स्थानमा उक्लेको छ । ब्रेन्टफर्ड ७ अंक सहित १४ औं स्थानमा छ।

चेल्सी विजयी

शनिबार नै अर्को खेलमा चेल्सीको बर्नली लाई ४–१ ले हरायो । एक गोलले पछि परेको अवस्था उल्ट्याउँदै चेल्सी जित निकाल्न सफल भएको थियो ।

चेल्सीका लागि कोल पाल्मर, रहिम स्टर्लिङ र निकोलस ज्याक्सनले समान १ गोल गर्दा अर्को आत्मघाती गोल उपहार पाएको थियो। चेल्सी ८ खेलमा ११ अंकसहित चेल्सी दशौं स्थानमा छ । बर्नली ४ अंक सहित १८ औं स्थानमा छ ।