काठमाडौँ (हाम्रो खेलकुद) – लाओससँगको फिफा विश्वकप एसियाली छनोट खेलको लागि नेपालको सुरुवाती ११ सार्वजनिक भएको छ ।

नेपाली टोलीका इटालियन प्रशिक्षक भिन्सेन्जो अल्बर्टो अनेसेले गोलरक्षक किरण चेम्जोङको कप्तानीमा नेपालको सुरुवाती ११ घोषणा गरेका हुन् । नेपालको पोस्ट किरणले सम्हाल्दा डिफेन्समा रोहित चन्द, अनन्त तामाङ, सनिश श्रेष्ठ र आशिष चौधरी रहेका छन् ।

मिडफिल्डमा लाकेन लिम्बु, आयुष घलान, र आवास लामिछाने तथा फरवार्डमा अन्जन विष्ट, मनिष डाँगी र जिलेस्पे जंग कार्की रहेका छन् । पहिलो पटक राष्ट्रिय टोलीमा परेका हिमालयन शेर्पा क्लबका डिफेन्डर अमृत श्रेष्ठ र न्यु रोड टिमका फरवार्ड सन्जीब विष्ट भने सुरुवाती ११ मा अटाएका छैनन् ।

यो खेल क्यानाडा, अमेरिका र मेक्सिकोमा २०२६ मा हुने विश्वकपको सुरुवाती चरणको छनोट खेल हो । डबल लेगको ढाँचामा खेलाइने पहिलो चरणको पहिलो खेल त्रिपुरेश्वर स्थित दशरथ रंगशालामा ५:३० बजे सुरु हुनेछ । फिफा वरियतामा एसियामा २७ देखि ४६ सम्म परेका २० टोलीले पहिलो चरणको छनोट दुई लेगमा होम-एण्ड-अवे खेल्ने ढाँचा रहेको छ ।

नेपालको पहिलो चरणको दोस्रो खेल भने अक्टोबर १७ मा लाओसमा हुने छ ।

नेपालको सुरुवाती ११:

किरण चेम्जोङ्ग (कप्तान), सनिश श्रेष्ठ, अनन्त तामाङ्ग, रोहित चन्द, आशिष चौधरी, लाकेन लिम्बु, आवास लामिछाने, मनिष डाँगी, आयुष घलान, अन्जन विष्ट, जिलेस्पे जंग कार्की