काठमाडौं (हाम्रो खेलकुद) – नेपाल फुटबल खेलाडी संघले आफ्नो दुई साझेदार संस्थालाई बिहीबार सम्मान गरेको छ । विश्व कप छनोटअन्तर्गत बिहीबार नेपाल र लाओसबीच १–१ को बराबरी टुंगिएको पहिलो लेगको खेलका दौरान ललिपुरको थ्री टेस्ला एमआरआाई एन्ड डाइग्नोष्टिक र बिएण्डबी अस्पताललाई सम्मान गरेको हो ।

फुटबल खेलाडी संघका पूर्व अध्यक्ष राजेश मानन्धर, राष्ट्रिय फुटबल टोलीका पूर्व कप्तान राजुकाजी शाक्य, पूर्व कप्तान एवं उपाध्यक्ष विराज महर्जन र वरिष्ठ उपाध्यक्ष विकेश कुथुले थ्री टेस्लाकी मेनेजर निर्मला श्रेष्ठ तथा बिएण्डबीका डा. अमित जोशी, रुष्मा थापालगायतको टोलीलाई राष्ट्रिय टोलीका खेलाडीले हस्ताक्षर गरेको जर्सी फ्रेममा राखेर हस्तान्तरण गरेका थिए ।

खेलाडी संघ र बि एण्ड बि अस्पतालबीच खेलाडीको उपचार तथा औषधिमा विशेष छुटसहित विभिन्न सचेतनामुलक कार्यक्रम सन्चालन गर्ने गत महिना सम्झौता भएको थियो । संघले ए, बी र सी डिभिजन, महिला लिग, महिला र पुरुष राष्ट्रिय टोली तथा उमेर समूहको राष्ट्रिय टोलीबाट खेलेका खेलाडीले सदस्यता लिएर बिएण्डबी सुविधा लिन पाउनेछन् । अस्पतालले खेलाडीको उपचारमा २० प्रतिशत छुट दिनेछ ।

बि एण्ड बिले आर्थोस्कोपी शल्यक्रियामा अन्य अस्पतालको तुलनामा झन्डै आधा रकममा विशेष प्याकेज ल्याएको थियो । फुटबल खेलाडीले भने प्याकेजमा पनि थप २० प्रतिशत छुट पाउनेछन् । त्यस्तै फुटबल खेलाडीको परिवारको उपचारमा पनि अस्पतालले १५ प्रतिशत छुट दिनेछ ।

अस्पतालमा उपलब्ध औषधिमा पनि १२ प्रतिशत छुट दिइनेछ । विपन्न वर्गका खेलाडीले लागि वार्षिक रुपमा सिमित कोटामा खेलाडीलाई निशुल्क उपचार सेवा पनि बिएण्डबीले उपलब्ध गरानेछ । संघ र अस्पतालको सहकार्यमाखेलाडीहरुको निम्ति स्वास्थ्य तथा खेल दुर्घटना सम्बन्धी शैक्षिक कार्यक्रम संचालनमा प्राविधि सेवा प्रदान गरिने सम्झौता छ ।

त्यस्तै दुई महिना अघि फुटबल खेलाडीहरुलाई एमआरआई लगायत अन्य परिक्षणमा छुट दिने थ्री टेस्लाबीच सम्झौता भएको थियो । सम्झौता अनुसार खेलाडीलाई थ्री टेस्लाले आफ्नो सेवा शुल्कमा ५०% छुट दिनेछ ।

पुरुषतर्फ ए,बी र सी डिभिजन लिग तथा महिलातर्फ राष्ट्रिय लिग खेलेका खेलाडी तथा राष्ट्रिय टोली वा उमेर समूहको राष्ट्रिय टोलीबाट खेल्दा चोट लोको खेलाडीले टेस्लामा परिक्षण गराउनु परेको अवस्थामा छुट पाउनेछन् । त्यी खेलाडीका अभिभावकले २५ प्रतिशत छुट पााउनेछन् ।

विपन्न वर्गका खेलाडीलाई भने शत प्रतिशत छुट उपलब्ध गराउने दुई पक्षबीच सम्झौता छ । संघले अल फर बल र थ्री टेस्लाले फुटबल सम्बन्धि कार्यक्रम आयोजना गर्दा आवश्यक समन्वय गर्ने सहमती दुई पक्षबीच रहेको छ ।