एजेन्सी – एन्थोनी गोर्डनको विवादास्पद गोलको मद्दतले इंग्लिस प्रिमियर लिग शनिबार न्युक्यासल युनाइटेडले आर्सनल माथि १–० जित निकालेको छ । न्युक्यासलको जितमा एन्थोनी गोर्डनले एकमात्र गोल गरेका हुन् । प्रिमियर लिगको यो सिजन आर्सनलको पहिलो हार हो ।

खेलको पहिलो स्पष्ट मौका सृजना हुन दुबै टोलीले धेरै समय कुर्नु परेको थियो। २९औं मिनेटमा क्यालम विल्सनको प्रहार पोस्ट माथि बाट बाहिरियो । पहिलो हाफको अन्त्यमा गाब्रिएल मार्टीनेलीको प्रहार न्युक्यासल गोलरक्षक निक पोपले सहजै बचाए ।

६१औं मिनेटमा आर्सनलका डेकलान राइसको हेडरले पनि पोस्टको दिशा लिन सकेन । ६४औं मिनेटमा खेलमा गोर्डनले गोल गर्दै न्युक्यासललाई अग्रता दिलाए । गोलमा जो विलकले बल लाइन भित्र राखे–नराखेको, जोलिंगटनको आर्सनल गोलरक्षक डेभिड राया माथिको फाउल र गोर्डन अफसाइड रहे–नरहेको बारे भिडियो असिस्टेन्ट रेफ्रीले निकै लामो समय जाँच गरेका थिए ।

तर अन्त्यमा गोल मान्य भयो। आर्सनलका खेलाडी र प्रशिक्षक कोही पनि त्यस निर्णयलाई लिएर खुसी देखिएनन् । आर्सनल प्रशिक्षक मिकेल आर्टेटाले खेल पछि प्रिमियर लिगमा आफु २० वर्ष रहेपनि त्यस निर्णयले आफूलाई “लाज लागेको“ जिकिर समेत गरे ।

जितसँगै न्युक्यासल ११ खेलमा ६ जित, २ बराबरी र ३ हारसहित २० अंकका साथ छैठौं स्थानमा उक्लिएको छ । ११ खेलमा ७ जित, ३ बराबरी र १ हार बेहोरेको आर्सनल २४ अंक सहित तेस्रो स्थानमा छ ।