एजेन्सी – दुई साता अघिसम्म सम्म इंग्लिस प्रिमियर लिगमा अपराजित रहेको टोटनहम हटस्पर लगातार दुई खेलमा पराजित भएको छ।

गत साता चेल्सीसँग पराजय भोगेको टोटनहमले शनिबार वल्भसलाई २-१ को नतिजा सुम्पेको छ।

निलम्बन र चोटहरूका कारण पहिलो रोजाइका धेरै खेलाडी बिना मैदान उत्रिएको टोटनहमले खेलमा अग्रता तेस्रो मिनेटमा नै लिएको थियो। पेड्रो पोर्रोको पासमा ब्रेनन जोन्सनले गोल गर्दै आफ्नो टोलीलाई अग्रता दिलाएका थिए।

त्यसपछि भने टोटनहमले खेलमा प्रभुत्व जमाउन सकेन। त्यसपछि वल्भसले खेलमा मौका सृजना गर्न थाल्यो। ३३औं मिनेटमा मारियो लेमिनाको प्रहार टोटनहम गोलरक्षक भिकारियोले राम्रो बचाउ गरे।

पहिलो हाफको अन्तिम तिर लेमिनाको हेडर बेन डेभिसले ब्लक गरे। ५३औं मिनेटमा ऐट-नुरीको पासमा म्याथियस कुन्हाको प्रहारले पोस्टको दिशा लिन सकेन। ५५औं मिनेटमा ह्वांग हि- चानको प्रहारले पनि पोस्टको दिशा लिन सकेन।

८१औं मिनेटमा म्याट डोहर्टीको प्रहार पनि डेविसले ब्लक गरे।धेरै मौका खेरा फालेको वल्भसले खेलको समयमा दुई गोल गर्दै जित ३ अंक जोड्यो।

इन्ज्युरी समयको पहिलो मिनेटमा कुन्हाको पासमा पाब्लो साराबियाले गोल गर्दै खेल बराबरीमा ल्याए थिए। त्यसको ६ मिनेट पछि भने वल्भसले अर्को गोल गर्दै जित हासिल गर्यो। साराबियाको थ्रु-पासमा लेमिनाले गोल गर्दै टोलीलाई जित दिलाए।

टोटनहम १२ खेलमा २६ अंकका साथ दोस्रो स्थानमा छ। वल्भस १२ खेलमा १५ अंक सहित १२औं स्थानमा उक्लिएको छ। प्रिमियर लिगमा आज थप ४ खेल हुँदै छन्।