एजेन्सी – लिभरपुल इंग्लिस प्रिमियर लिग तालिकाको दोस्रो स्थानमा उक्लिएको छ। ब्रेन्टफर्ड माथि आइतबार ३-० को सहज जित निकाल्दै लिभरपुल दोस्रो स्थानमा उक्लिएको हो।

लिभरपुलको जितमा मोहम्मद सालाहले २ र डिएगो जोटाले १ गोल गरे। खेलको ३९औं मिनेटमा लिभरपुलले सालाहको गोल बाट अग्रता लियो। डार्विन नुनेजको पासमा सालाहले राम्रो फिनिस गर्दै खेलमा अग्रता दिलाए।

दोस्रो गोल सालाहले नै ६२औं मिनेटमा गरे। कोस्टास सिमिकासको क्रसमा सालाहले सहज हेडर गोल गरेका थिए। ७४औं मिनेटमा सिमिकासकै पास लिएर जोटाले बक्सको छेउ बाट सानदार गोल गर्दै जित सुनिश्चित गरे।

लिभरपुलको १२ खेलमा २७ अंक पुगेको छ। पहिलो स्थानमा रहेको म्यानचेस्टर सिटीको २८ अंक छ। पराजित ब्रेन्टफर्डको १६ अंक छ।

वेस्ट ह्याम र एस्टन भिल्लाको जित

सोही समयमा भएका खेलमा वेस्ट ह्याम र एस्टन भिल्लाले पनि जित निकालेका छन्।

भिल्लाले फुलह्याम माथि ३-१ को सहज जित निकालेको हो। भिल्लाको जितमा ओल्ली वाटकिन्स र जोन मक्गिनले समान १ गोल गर्दा अर्को गोल भने आत्मघाती थियो।

भिल्ला १२ खेलमा २५ अंक सहित पाँचौं स्थानमा छ। पराजित फुलह्याम भने १२ अंक सहित १६औं छ।

वेस्ट ह्यामले नटिङ्घम फरेस्ट माथि ३-२ को रोमाञ्चक जित निकाल्यो। वेस्ट ह्यामको जितमा लुकास पाकेटा, ज्यारड बावेन र थोमस सुचेकले गोल गरे। फरेस्टका लागि टाइवो अवोनिवि र एन्थोनी इलांगाले गोल गरेका थिए।

अर्को खेलमा ब्राईटन र सेफिल्ड युनाइटेडले १-१ को बराबरी खेलेका छन्।