सुबास हुमागाईं, काठमाडौं

नेपाल सुपर लिग २ अन्तर्गत प्लेअफसहित कुल ४० खेलमा २१ खेल सम्पन्न भएका छन् । लिगको उत्तर्रार्द्धमा अघि बढ्दा हालसम्म झापा एफसी र वीरगन्ज युनाइटेडले मात्र जित निकाल्न बाँकी छ । धनगढी र ललितपुर लिगमा अपराजित छन् ।

इलामको ७२ प्रहार – मात्र ४ गोल

स्पोर्टिङ इलाम डे मेची एफसी यस प्रतियोगितामा हालसम्म सबैभन्दा बढी गोलका लागि सट प्रहार गर्ने टोली हो । इलामले ५ खेलमा ७२ प्रहार गर्दा २९ टार्गेटमा रहेर ४ गोल मात्र सम्भव भएको छ । प्रतियोगितामा ५ खेल खेल्दा सबै खेलमा कम्तिमा १३ सट प्रहार गरेको छ ।

इलामले दुई पटक पेनाल्टी चुकाएको इलामले दुई खेलमा भने गोल गर्न सकेन । ५ खेलमा १ जित, १ बराबरी र ३ हारको नतिजासहित इलाम अंक तालिकाको तल्लो भागमा छ । इलामले अब बुधबार वीरगन्ज, शनिबार चितवन र आफ्नो अन्तिम खेलमा आइतबार ललितपुरको सामना गर्नेछ ।

क्लबले सेनेगलबाट युवा खेलाडी अनुबन्ध गरेको छ । तर अनुभवको कमी रहँदा अवसर सदुपयोग गर्न नसकेको प्रशिक्षक मेघराज केसी पनि स्वीकार्छन् । संयोगवश इलामको सबै ४ गोल ४ फरक विदेशी खेलाडीबाट आएको छ ।

सट प्रहार गर्नेमा बुटवल लुम्बिनी ५१ सटसहित दोस्रो स्थानमा छ । यसमध्य २४ सट टार्गेटमा रहेका छन् । सबैभन्दा कम प्रहार गर्ने टोली वीरगन्जले ३७ सट लिँदा १३ मात्र टार्गेटमा छन् ।

ललितपुरको २ दर्जन अफसाइड

प्रतियोगिताको ५ खेलमा ७ गोल गर्दै ललितपुर सबैभन्दा धेरै गोल गर्ने टोली बनेको छ । आक्रमणमा इमोह इजेकेललाई मुख्य हतियार बनाएको ललितपुरको गतिले धेरै डिफेन्सलाई समस्या दिएको छ । तर सँगसँगै सहायक रेफ्रीले यसक्रममा २४ पटक अफसाइड दिएका छन् ।

ललितपुरले ४२ प्रहारमा २४ टार्गेटमा राख्दा ७ गोल गरेको छ । यसक्रममा टोलीले २३ पटक कर्नर पनि जितेको छ । फ्रान्सेली फरवार्ड पापा इबु केबेले २ गोल गर्दा अन्य ५ खेलाडीले १-१ गोल गरेका छन् ।

झापा – गरेको गोल १ खाएको २

झापा एफसीमा गोलको खडेरी लाग्नुले पनि टोलीको लिगमा स्थान माथि आउन सकेको छैन । ४ खेल खेलेको झापाले ४३ सट लिँदा २४ प्रहार टार्गेटमा राखेको छ । तर यसबाट हालसम्म क्लबले मात्र १ गोल गरेको छ । उक्त गोल इन्ज्युरी समयमा डिफेन्डर समन्दर ओचिलोभले गरेका थिए ।

झापाले २५ कर्नर प्राप्त गर्दा कुनैको सदुपयोग गर्न सकेको छैन भने २ खेलमा क्लिन सिट राखेको छ । ३ खेलमा बराबरी र १ खेलमा पराजय भोगेको झापाका खेलाडी १५ पटक अफसाइड परेका छन् । हालसम्म ३ टोलीका खेलाडीले रातो कार्ड पाउँदा झापा मात्र २ रातो कार्ड पाउने टोली हो ।

कार्डमा बुटवलको अग्रता

बुटवल लुम्बिनीले ५ खेलमा १२ पहेंलो कार्ड राप्त गरिसकेको छ । झापाले ४ खेलमा ११ कार्ड पाउँदा आज बुटवललाई उछिन्ने सम्भावना छ । यता चितवन र ललितपुरले भने ५ खेलमा ५-५ पहेंलो कार्ड मात्र पाएका छन् । चितवनको नाममा भने एक रातो कार्ड पनि छ ।

चितवनको कमजोर डिफेन्स

एनएसएल २ मा चितवन ८ गोल खाएर सबैभन्दा बढी गोल खाने टोली बनेको छ । मार्को इभानोभिच र मुबारक युसुफलाई सेन्टर डिफेन्समा खेलाएपनि कप्तान विशाल श्रेष्ठ लामो दुरीबाट गोल खाँदा समस्यामा परेका छन् ।

दोस्रो स्थानमा बुटवलले ६ गोल खाएको छ । चितवन र बुटवलले लिगको सबै खेलमा गोल खाएको अवस्था छ । हालसम्म झापाले ४ खेलमा २ गोल मात्र खाएको छ । क्लिन सिटमा भने ललितपुर र पोखराले ३-३ खेलमा गोल खाएका छैनन् ।

भारतीय रेफ्रीलाई ९ खेल

लिगको २१ खेल सकिँदा मुख्य रेफ्रीमा २ भारतीयले ९ खेल खेलाएका छन् । राम दशनले ५ खेल खेलाउँदा सुरोजित दासले ४ खेलमा जिम्मेवारी लिएका छन् । नेपाली रेफ्रीमा नविन्द्र महर्जनले ४, प्रज्वल क्षेत्रीले ३, उमेश विडारी र कविन ब्यन्जनकारले २-२ तथा श्याम दनुवारले १ खेल खेलाएका छन् ।

सबैभन्दा बढी पहेंलो कार्ड देखाउनेमा राम दशन र नविन्द्र महर्जनले १८-१८ पहेंलो कार्ड देखाएका छन् । रामले २ रातो कार्ड पनि दिएका छन् ।

एनएसएलको सम्पूर्ण तथ्यांक विस्तृत रुपमा हेर्न यहाँ थिच्नुहोस