काठमाडौं (हाम्रो खेलकुद)– नेपाली राष्ट्रिय फुटबल टोलीका मिडफिल्डर जगजित श्रेष्ठ एक बर्षमा दोस्रो अस्ट्रेलियन क्लबमा आबद्ध भएका छन् । उनले यसै साता अस्ट्रेलियन नेसनल प्रिमियर लिग (एनपिएल) क्लब भिक्टोरियाको सनसाइन जर्ज क्रस एफसीसँग सम्झौता गरेका छन् ।
झन्डै ९ महिनाका लागि सम्झौता गरेपछि उनले पारिश्रमिक भने खुलाउन चाहेनन् । ‘पारिश्रमिक गोप्य राख्ने सहमति छ ’जगजितले हाम्रो खेलकुदसँग भने, ‘तर यसअघिको अर्को क्लबमा भन्दा राम्रो छ । ’
यसै बर्षको सुरुआत तिर अस्ट्रेलिया पुगेका जगजितले साउनमा भिक्टोरिया स्टेटको बी डिभिजन टोली ह्युम युनाइटेड एफसीबाट तीन महिना खेलेका थिए । त्यति बेला उनले १ हजार ५ सय अमेरिकी डलर मासिक पारिश्रमिक लिन्थे । गैर अस्ट्रेलियन २ खेलाडी राख्न पाउने प्रावधान अनुसार जर्जले उनलाई क्लबमा समेटेको हो ।
फेब्रुअरी ४ बाट सुरु हुने लिगका लागि जगजित उत्साहित छन् । ‘अहिले हामी प्रशिक्षणमा छौं । प्रशिक्षण राम्रो भइरहेको छ’ मनाङ, रुस्लान थ्री स्टार, फ्रेन्ड्स क्लब र हिमालयन शेर्पाबाट खेलिसकेका जगजितले भने, ‘पहिला भन्दा अझै राम्रो मौका पाएको छु । म टोलीलाई सफल बनाउन आफ्नो तर्फबाट सतप्रतिसत दिनेछु ।’ केही बर्षअघि हिमालयन शेर्पाको पहलमा उनी जर्मनी गएर केही साताको अभ्यास गरेर फर्केका थिए ।
नेपालले गत बर्ष दुई महत्वपूर्ण उपलब्धी हासिल गर्दा जगगित पनि टोलीका सदस्य थिए । फागुनमा भारतमा १२ औं दक्षिण एसियाली खेलकुदमा यू २३ ले स्वर्ण पदक जित्नुअघि राष्ट्रिय टोलीले माघमा बंगलादेशमा बंगबन्धु गोल्डकप जित्दा जगजित टोलीमा थिए । दुई महिना अघि नेपालले एएफसी सोलिडारिटी कप जित्दा भने उनी टोलीमा थिएनन् ।
