काठमाडौं (हाम्रो खेलकुद) – मलेसियामा भएको हिमालयन गोल्डकप फुटबलको उपाधि आयोजक हिमालयन फुटबल क्लबले नै जितेको छ । डिकेएमभीएफसीलाई टाइब्रेकरमा हराउँदै हिमालयनले उपाधि जितेको हो । निर्धारित र थप समयमा ३–३ गोलको बराबरीपछि खेलको निर्णय टाइब्रेकरमा भएको राष्ट्रिय खेलकुद परिषद् (राखेप)ले जनाएको छ ।
उपाधिसँगै हिमालयनले १८ हजार आरएम (मलेसियन मुद्रा) प्राप्त गर्यो । डिकेएमभीएफसीले ९ हजार आरएम पायो । तेस्रो स्थानको हिमालयन फुटबल क्लब ‘बी’ ले ३ हजार आरएम हात पार्यो । विजयी टोलीका खेलाडीलाई राखेपका पूर्व उपाध्यक्ष पिताम्बर तिमल्सिना, एनआरएन मलेसियाका अध्यक्ष विश्व राई राष्ट्रिय टोलीका पूर्वकप्तान हरि खड्का र नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक विष्टले पुरस्कृत गरे ।
तीन दिन सम्म चलेको प्रतियोगिताको उद्घाटन नेपाली राजदूत डा निरञ्जन मानसिंह बस्नेतले गरेका थिए । आयोजक क्लबका अध्यक्ष सन्तोष कार्कीले भने ‘प्रतिभावान् खेलाडी खोज्नका लागि हामीले यो प्रतियोगिता आयोजना गरेका हौं । प्रवासमा पनि स्तरीय खेलाडीहरु छन् भन्ने सन्देश प्रतियोगिताको आयोजनाले दिएको छ । आगामी वर्ष पनि यसरी नै प्रतियोगिता आयोजना गर्नेछौ ।’
नेपाली राष्ट्रिय टोलीका पूर्व कप्तान खड्काले विदेशी भूमिमा काम गर्न आएका प्रतिभावान् खेलाडीले यस्ता प्रतियोगिता मार्फत आफ्नो प्रतिभा देखाउने मौका पाउने बताए । ‘तपाईहरु विभिन्न कारणवस विदेशिनु भयो होला,’ उनले भने, ‘यस्ता प्रतियोगिताले प्रतिभा देखिनेछ । राष्ट्रिय टोलीका लागि देश–विदेशमा रहेका यस्तै प्रतिभाको खाँचो छ ।’
