सिमरा (हाम्रो खेलकुद) – प्रतिष्ठत फुटबल प्रतियोगिताको रुपमा रहेको रुस्लान सिमराको गोल्डकपको आठौ संस्करणको तयारी पुरा भएको आयोजक नव जनजागृति युवा क्लबले जनाएको छ । माघ २० गते हुने प्रतियोगिताको उद्घाटन खेल आयोजक र सरस्वती युथ क्लबबीच हुनेछ ।

प्रतियोगितामा ए डिभिजनका पाच र मोफसलका पाच गरी १० टिमको सहभागीता रहनेछ । प्रतियोगितामा ए डिभिजनका नेपाल आर्र्मीको त्रिभूवन क्लब, एपिएफ क्लब, सिएमजी संकटा क्लब, हिमालयन शेर्पा क्लब र सरस्वती युथ क्लब सहभागी हुनेछन् । प्रतियोगितामा मोफसलका साविक बिजेता बिजय युथ क्लब, उपबिजेता वीरगन्ज युनाईटेड क्लब, सहारा क्लब पोखरा, रुपन्देही ११ र आयोजक नव जनजागृति युवा क्लब सहभागी हुनेछन् ।

अखिल नेपाल फुटबल संघ (एन्फा) का अध्यक्ष नरेन्द्र श्रेष्ठले उद्घाटन गर्ने प्रतियोगिताको बिजेताले पाँच लाख ५१ हजार रुपैयाँ प्राप्त गर्नेछ । उपबिजेताले भने दुई लाख ५१ हजारमा रुपैयाँ पाउनेछ । प्रत्येक बर्ष पुरस्कार राशी बृद्धि गर्दै आएको आयोजकले यस बर्ष भने सो राशी बृद्धि नगरेर खेलाडी प्रोत्साहन भत्ता बढाएको छ ।

प्रतिस्पर्धामा जानुभन्दा पनि खेल खेल्ने खेलाडीलाई प्रोत्साहन गर्नका लागि उनिहरुलाई दिईने सुविधा बढाएको आयोजक क्लबका अध्यक्ष एवंम् प्रतियोगिता मुल आयोजक कमिटिका अध्यक्ष कासिम मियाले जानकारी दिए । प्रतियोगिताको सर्र्वाेत्कृष्ट खेलाडीले यामाहा मोटरसाईकल पाउनेछन् ।

यसैगरी प्रतियोगिता अवधीमा उत्कृष्ट खेल प्रदर्शन गर्ने गोलकिपर, डिफेन्स, मिडफिल्ड, फरवार्ड, सर्वाधिक गोलकर्ता र प्रशिक्षकलाई जनही १५ हजार रुपैयाँ प्राप्त गर्ने सचिव शम्भुसिंह ठकुरीले बताए । प्रत्येक खेलको म्यान अफ दि म्याच घोषित हुने खेलाडीलाई ५ हजार रुपैयाँ पाउनेछन् । आयोजकले यस बर्ष खेल अवधीमा हुने सम्भावित दुर्घटनालाई मध्यनजर गर्दै ६३ जनाको जीवन बिमा गरेको छ । अध्यक्ष मियाका अनुसार खेलाडी, रेफ्री, दर्शक, पत्रकार र प्रतियोगितामा खटिएका आयोजक क्लबका सदस्यको बिमा गरिएको हो ।

खेल अवधीमा घाईते भएमा ५० हजारसम्मको दुर्घटना बिमा र घाईते भई कसैको मृत्यु भएको पाच लाखसम्मको बिमा गरिएको अध्यक्ष मियाले बताए । झण्डै तीन महिनादेखी ५१ सदस्यीय मुल आयोजक कमिटि र विभिन्न उपसमिति गठन गरेर तयारी थालेको आयोजकले खेल सञ्चालन गर्नका लागि आवश्यक सबै पूर्वाधार तयार पारेको छ ।

मैदान मर्मत, रंगशाला घेर्ने, प्यारापीट मर्मतलगायत सबै पूर्वाधार तयार गर्ने काम सम्पन्न भएको अध्यक्ष मियाले बताए । यस क्षेत्रकै उत्सवको रुपमा रहेको प्रतियोगिता नजिकिदै गएपछि सिमरालगायत आसपासका चोकलाई सजाउन थालिएको छ । रंगशाला निर्माण, फुटवल एकेडेमी सञ्चालनलगायत खेलकुदको बिकास गर्ने विभिन्न उदेश्यसहित प्रत्येक बर्ष आ योजना भईरहेको प्रतियोगिता हेर्न दर्शक पनि उत्साहित भएका छन् ।

झण्डै ६८ लाख रुपैयाँ बजेट रहेको प्रतियोगितालाई बिजयी डिष्ट्रिलरीले मुख्य प्रायोजन गरेको छ । प्रतियोगितालाई सफल बनाउन विभिन्न उद्योग, उद्योगी ब्यवसायी, होटल, संघसंस्था र स्थानियले सहयोग पु¥याएका छन् ।