काठमाडौं (हाम्रो खेलकुद)- खेलको अन्त्यतिर उत्कृष्ट पुनरागमन गर्दै एपिएफ एन्फा महिला लिगको फाइनलमा प्रवेश गरेको छ।

सातदोबाटो स्थित एन्फा कम्प्लेक्सको मैदानमा रश्मि कुमारी घिसिङको २ गोलमा त्रिभुवन आर्मी फुटबल क्लबलाई २-१ ले हराउँदै एपिएफ फाइनल पुग्ने पहिलो बनेको छ। सुरुवात लिएको अग्रता जोगाउन नसक्दा आर्मीले फाइनल प्रवेशका अर्को चुनौतीको सामना गर्ने पर्ने भएको छ।

आठौं मिनेटमा हिमा चौधरीको गोलमा आर्मीले अग्रता लिएको थियो । दोस्रो हाफमा पटक पटकको प्रयासपछि एपिएफ बराबरी गोल गर्न सफल भएको थियो। ७८ औं मिनेटमा रश्मिले बराबरी गोल गरेकी थिइन्।

पेनाल्टी बक्सबाट रश्मिको प्रहारलाई आर्मीकी गोलकिपर अन्जना रानाले बल रोके पनि पूर्ण रुपमा नियन्त्रणमा लिन असफल भएपछि गोलमा परिणत भएको थियो।

निर्धारित समय सकिने २ मिनेट बाँकी रहँदा प्रीति राईको सटिक पासमा कसैको निगरानीमा नरहेकी रश्मिले पेनाल्टी बक्सबाट गोल गरेकी‌ थिइन् । त्यहि गोल निर्णायक बनेको थियो। जारी लिगमा रश्मिको त्यो ३५ औं गोल हो।

इन्ज्युरी समयमा आर्मी विमला चौधरीको वान भर्सेस वानलाई एपिएफकी सावित्री किसानले बचाउन सम्भावित बराबरी टारेकी थिइन् ।

आर्मीले एलिमिनेटरको विजेता नेपाल पुलिस क्लबसँग सोमवार दोस्रो क्वालिफायर खेल्नेछ । त्यसको विजेताले माघ १६ गते एपिएफसँग फाइनल खेल्नेछ।