चितगोङ (हाम्रो खेलदकुद) – लक्ष्मी हुन्डाई मनाङ मस्र्याङ्दी क्लब शेख कमल अन्तर्राष्ट्रिय क्लब कप–२०१७ को समूह चरणको दोस्रो खेलमा बुधबार अफगानिस्तानको शाहिन आस्मयीसँग ३–१ ले पराजित भएपछि प्रशिक्षक छिरिङ लोप्साङ गुरुङले कप्तान अनिल गुरुङको हेड प्रहारमा बल बारमा लागेर फर्कनु नै खेलको टर्निङ प्वाइन्ट भएको बताएका छन् ।अनिलको प्रहार गोल हुन नसक्दा मनाङ १–० ले पछाडी थियो ।
‘पक्कै पनि अनिलको हेड गोल भएको भए खेल हाम्रो पक्षमा हुने थियो । त्यही नै पराजित हुनुको टर्निङ प्वाइन्ट बन्यो ,’ प्रशिक्षक गुरुङले भने, ‘तयारी राम्रै भएपनि शाहिनविरुद्धको खेलमा रक्षापक्तिमा केही समस्या भयो ।’ त्यसैले पराजित हुन पुग्यो ।’
शाहिनका खेलाडीहरु शारीरिक रुपमा बलियो रहेकाले आफ्ना खेलाडीले सोचेअनुरुप प्रदर्शन गर्न नसकेको प्रशिक्षण गुरुङलेब ताए । उनले हारको दोष रेफ्रीमाथि पनि पोखे । उनले थपे,‘ खेल २–१ को अवस्थामा हुदा रेफ्रीले गलत निर्णय लिएकोले पराजित हुन पर्यो ।’ शाहिनका लागि कप्तान अमिरुद्धिन सारिफीले ह्याट्रिक गरेका थिए भने मनाङका लागि बिमल बस्नेतले गोल फर्काएका थिए ।
दोस्रो खेलमा हारेपनि टोली सेमिफाइनल पुग्नेमा गुरुङ विश्वस्त देखिन्छन् । पहिलो हारसँगै मनाङले सेमिफाइनल प्रवेशका लागि अन्तिम खेल कुर्नुपर्ने भएको छ । मनाङले समूह चरणको पहिलो खेलमा मोहमोदेन स्पोर्टिङ क्लबलाई २–० ले पराजित गरेको थियो ।
समूह बीको अर्को खेलमा आयोजक चितगोङ अवहानी लिमिटेड र मोहमडनले बराबरी खेलेपछि अघिल्लो चरण पुग्ने चारै टोलीको सम्भावना जीवत छ । अवहानी ४ अंकसहित शीर्षस्थानमा रहँदा ३ अंक जोडेका शाहिन दोस्रो र मनाङ तेस्रो स्थानमा छ । मोहमडनको १ अंक छ । समूह चरणको अन्तिममा मनाङको सामना गर्ने भने मोहमडन र शाहिनबीच प्रतिस्पर्धा हुनेछ । समूहका शीर्ष दुई टोली सेमिफाइनल पुग्नेछन् ।
फोटोहरु- दिल तामाङ/एनएसजेएफ
