पोर्टो (एजेन्सी)– परिवर्तित मार्को प्याका र डानी आल्भेसले दोस्रो हाफमा गोल गरेपछि युभेन्ट्सले पहिलो लेगमा घरेलु टोलीलाई पोर्टोलाई २–० ले हराउँदै च्याम्पियन्स लिगको क्वार्टरफाइनल पुग्ने सम्भावनालाई बलियो बनाएको छ । च्याम्पियन्स लिगको अन्तिम १६ को अर्को खेलमा सेभियाले लेस्टरमाथि २–१ को जित हासिल गरेको छ ।

७३ सेकेन्डको बीचमा एलेक्स टेलेसले लगातार पहेलो कार्ड पाएपछि घरेलु टोली पहिलो हाफमै १० खेलाडीमाा सिमित भएको थियो । युभेन्ट्सले त्यसको पुरा पुर फाइदा उठाउँदै २ अवे गोल गर्न सफल भयो ।

टेलेसले २५ औं र २७ औं मिनेटमा पहेलो कार्ड खाएपछि ६३ मिनेट पोर्टो १० खेलाडीमा सिमित हुँदै खेलेको थियो । युभेन्ट्ले दोस्रो हाफमा दुई मिनेटको फरकमा दुई गोल गर्दै अघिल्लो चरणको सम्भावनालाई मजबुद बनाएको छ । प्याकाले ७२ औं र अल्भेसले ७४ औं मिनेटमा अर्को गोल गरेका थिए ।

अर्को खेलमा २–० ले पछि परेको अवस्थाबाट लेस्टर १ अवे गोल फर्काउन सफल भएको थियो । जेमी भार्डीले ७३ औं मिनेटमा गोल फर्काएका थिए । खेलको १४ औं मिनेटमा पेनाल्टीमा गोल गर्न चुकेको सेभियाका लागि पाब्लो साराबियाले २५ औं र जाक्विन कोरियाले ६२ औं मिनेटमा गोल गरेका थिए । सुरुआतमै कोरिया पेनाल्टीमा गोल गर्नबाट भने चुकेका थिए ।