काठमाडौं (हाम्रो खेलकुद)– सुप्रिम एकेडेमी र विनायक शिक्षा निकेतन दोस्रो मध्यपुर थिमी नगरपालिकाका कप अन्तर स्कुल फुटबल प्रतियोगिताको सेमिफाइनलमा पुगेका छन् । थिमी मैदानमा बुधबार सुप्रिमिले एभरेष्ट पब्लिक स्कुललाई ६–१ को फराकिलो अन्तरले हरायो भने अर्को खेलमा विनायकले आर्दश माविलाई टाइब्रेकरमा ४–३ ले पराजित गरेको थियो ।
सुप्रिमका लागि सविन थापाले ४ र कृष्ण थापाले २ गोल गरेका थिए । एभरेष्टका लागि रमेश कार्कीले एक गोल फर्काएका थिए । विनायक र आदर्शको निर्धारित ७० मिनेटको खेल १–१ को बराबरी भएपछि निर्णय पेनाल्टी सुट आउटमा भएको थियो । निर्धारित समयमा आदर्शले लिएको अग्रता जोगाउन सकेन ।
दीपेन्द्र काफ्ले १६ औं मिनेटमा गोल गर्दै अग्रता दिलाएपनि विनायकका रविन कुथुले ६८ मिनेटमा बराबरी गोल फर्काएका थिए । मध्यपुर युथ एसोसिएसनको आयोजना र मध्यपुर थिमी नगरपालिकाको प्रायोजनामा जारी प्रतियोगितामा बिहीबार सेमिफाइनल खेल हुनेछन् ।
