चितगोङ (हाम्रो खेलकुद) – बंगलादेशमा जारी शेख कमल अन्तर्राष्ट्रिय क्लब कपको सेमिफाइनल पुग्न आयोजक चितोगोङ अबहानीविरुद्ध जित्नै पर्ने बाध्यता साथ उत्रेको लक्ष्मी हुन्डाई मनाङ मस्र्याङ्दी क्लबले पहिलो हाफको समाप्तीसम्म २–१ को अग्रता लिएको छ ।
अहिलेको अग्रता जोगाउन सकेपछि मनाङ समूहको अर्को अन्तिम खेलअघि नै सेमिफाइनल पुग्नेछ । मनाङका लागि दुवै गोल ओलाडिपो ओलावाले आफिजले गरेका थिए । खेलको दोस्रो मिनेटमै उनले पहिलो गोल गर्दै मनाङलाई मजबुद अवस्थामा पुर्याएका थिए । विराज महर्जनको क्रस कप्तान अनिल गुरुङले हेडमार्फत पास दिएपछि आफिजले खाली पोस्टमा गोल गरे ।
२३ औं मिनेटमा उनले एकल प्रयासमा उत्कृष्ट गोल गर्दै गोलअन्तर दोब्बर पारेका थिए । अबाहनीका लागि नसरुद्दिन चौधरीले ३२ औं मिनेटमा गोल फर्काएका थिए । आफिजले पहिलो हाफको अन्त्यतिर ह्याट्रिकको अवसर गुमाएका थिए । अघिल्ला दुई खेलमा मनाङले पहिलोमा जित र दोस्रोमा हार बेहोरेको थियो ।
