काठमाडौं (हाम्रो खेलकुद)– वैदेशिक रोजगारीका लागि कतार पुगेका नेपाली राष्ट्रिय फुटबल टोलीका पूर्व सदस्य समेत सम्मिलित फुटबल टोलीले पाँचौं एसियन आप्रवासी फुटबल प्रतियोगिताको पहिलो खेलमा जापानी खेलाडी सम्मिलित टोलीलाई १०–० ले हराएको छ ।

पूर्व राष्ट्रिय एवंम् लक्ष्मी हुन्डाई मनाङ मस्र्याङदीका खेलाडी शिव श्रेष्ठ र एपिएफका पूर्व खेलाडी अर्जुन सुब्बाले ह्याट्रिक गरेको खेलमा मनाङका पूर्व खेलाडी अमिर श्रेष्ठ र गणेश खड्काले पनि गोल गरे । गणेशले २ गोल तथा अमरि र अनिल धिमालले समान १ गोल गरे ।

चौथो मिनेटमा अमिरको पासमा अर्जुनले गोल गरे भने त्यसको एक मिनटे नवित्दै शिवले सुदेश श्रेष्ठको पासमा गोल गरे । सातौं मिनेटमा अर्जुनले अर्को गोल गरे । त्यो गोलमा शिवको पास थियो । एकतर्फी खेलको नवौं मिनेटमा अनिलले गोल गरे । १६ औं मिनेटमा शिवले अर्को गोल थपे भने गणेशले २५ औं मिनेटमा गोल गर्दा नेपाली टोली पहिलो हाफमा ६–० ले अगाडी रह्यो ।

६० मिनेटको खेलको ३३ औं मिनेटमा अर्जुनले अर्को गोल थप्दै ह्याट्रिक पुरा गरे । शिवले ३४ औं मिनेटमा गोल गर्दै ह्याट्रिक पुरा गरे । ३९ मिनेटमा कप्तान समेत रहेका अमिरले गोल गरे भने खेल सकिन दुई मिनेट बाँकी रहँदा गणेशले अर्को गोल गरे ।

खेलमा कतारमा रहेको नेपाली दुतावासका द्धितिय सचिव हरिप्रसाद अर्यालको पनि उपस्थिति रहेको थियो । दोहामा सञ्चालित आप्रवासी खेलमा वैदेशिक रोजगारीमा आएका १२ देश खेलाडी सम्मिलित टोलीको सहभागिता छ । नेपाली टोलीले मार्च आठमा मलेसियाका खेलाडी सम्मितिल टोलीसँग प्रतिस्पर्धा गर्ने बताइएको छ ।