बुटवल (हाम्रो खेलकुद)– तिलोत्तमा गोल्डकप अन्तर्गत दोस्रो सेमिफाइनलमा आयोजक अग्नी रुपन्देही ११ र धरान एफसीबीच आइतबार प्रतिस्पर्धा हुँदैछ । खेल देवीनगरस्थित एन्फा टेक्निकल सेन्टरमा हुनेछ । रुपन्देही र धरान दुवै गत साता १९ औं बुढासुब्बा रेडबुल गोल्डकप फुटबल प्रतियोगिताको सेमिफाइनलमा रोकिएका टोली हुन् ।
फाइल फोटो
बुढासुब्बाको सेमिफाइनलमा रुपन्देही सिएमजी क्लब संकटासँग २–१ र धरान नेपाल पुलिससँग ३–१ ले पराजित भएको थियो ।
शनिबार संकटालाई सडन डेथमा हराउँदै पुलिसले बर्षको पहिलो उपाधिका रुपमा बुढासुब्बा जितेको थियो । रुपन्हेदीले धरान जानुअघि रमपम चौथो उदयपुर गोल्डकपको उपाधि जितेको थियो । धरानले भने यो सिजन कुनै फाइनल खेलेको छैन ।
झापा ११ लाई हराउँदै हिमालयन शेर्पा शनिबार प्रतियोगिताको सेमिफाइनलमा पुगिसकेको छ । तिलोत्तमाको विजेताले उपाधिसहित ५ लाख ५५ हजार ५ सय ५५ रुपैयाँ प्राप्त गर्नेछ ।
