सिमरा (हाम्रो खेलकुद) – मोफसलको प्रतिष्ठित फुटबल प्रतियोगितामध्येको एक रुस्लान सिमरा गोल्डकपको आठौं संस्करणबाट १५ लाख रुपैयाँ बढी बचत भएको छ । आयोजक नव जनजागृति युवा क्लबले प्रतियोगिताबाट १५ लाख ४० हजार बचत भएको जानकारी दिएको छ ।

प्रतियोगिता आयोजना गर्नका लागि संकलित ५५ लाख ५७ हजारबाट ४० लाख १६ हजार खर्च भएको विवरण क्लबले सार्वजनिक गरेको छ । क्लबले टिम ब्यवस्थापनका लागि २१ लख ५६ हजार, मैदान मर्मतमा तीन लाख ८३ हजार, प्रचारमा तीन लाख खर्च गरेको जनाएको छ ।

प्रतियोगितामा टिकटबाट ७ लाख रुपैयाँ संकलन गरेको क्लबका अध्यक्ष कासिम मियाले बताए । जिल्लाकै उत्सवको रुपमा रहेको प्रतियोगिता सफल रुपमा सम्पन्न भएको भन्दै अध्यक्ष मियाले बचत रकम फूटवलको बिकासमा खर्च गरिने बताए ।

‘बचत रकम विगतमा जस्तै फूटवलको बिकासमा खर्च गर्नेछौ’ मियाले भने ‘क्लबाबाट सञ्चालित सिमरा एकेडेमीबाट खेलाडी उत्पादन गर्नुनै हाम्रो मुख्य उदेश्य हो ।’ क्लबले टिकटबाट संकलित रकमको ५ प्रतिशत रकम वातावरण संरक्षणका लागि सहयोग गरेको छ । स्थानिय थानीमाई सामुदायिक बन उपभोक्ता समितिलाई ३७ हजार ९ सयको चेक हस्तान्तरण गरिएको थियो ।

माघ २० गतेदेखी २९ गतेसम्म आयोजना गरिएको प्रतियोगिताको उपाधि सिएमजी क्ल्ब संकटाले जितेको थियो । विभागिय टोली त्रिभुवन आर्मी क्लबलाई टाईब्रेकरमा ४–२ ले हराउँदै संकटा विजयी भएको थियो । संकटाले उपाधिसहित ५ लाख ५१ हजार र आर्मीले भने २ लाख ५१ हजार रुपैयाँ प्राप्त गरेको थियो । जनजागृति युवा क्लबले ब्यवसायिक भवन निर्माण गर्ने लक्ष्य लिएको क्लबका सचिव शम्भुसिंह ठकुरीले बताए ।