नुवाकोट (हाम्रो खेलकुद) – नेपाल पुलिस क्लबले प्रथम बागमती प्रदेश मुख्यमन्त्री कप राष्ट्रिय महिला फुटबल प्रतियोगिता २०८२ को सेमिफाइनलमा स्थान पक्का गरेको छ ।

बट्टारस्थित नुवाकोट आदर्श बहुमुखी क्याम्पसको खेल मैदानमा पुलिसले गण्डकी प्रदेशलाई ४-० ले पराजित गरेको हो । पुलिसको जितमा सुष्मा तामाङले २ गोल गर्दा निर्मला उपाध्याय र अमृता जैशीले १-१ गोल गरे । पुलिसले अब सेमिफाइनलमा संकटाको सामना गर्नेछ ।

पुलिसले पहिलो हाफको १७ औं मिनेटमा सुरुवाती अग्रता लिएको थियो । अमृता जैशीले पेनाल्टी क्षेत्रको ठिक बाहिरबाट प्रहार गरेको फ्रिकिक गण्डकीकी गोलरक्षक मनिषा तामाङले बचाउन नसक्दा गोल भयो ।

२८ औं मिनेटमा सुष्माले अग्रता दोब्बर पारिन् । मिना देउवाले दिएको लो क्रसलाई सुष्माले सहजै गोलमा परिणत गरिन् । दोस्रो हाफको ४४ औं मिनेटमा निर्मला उपाध्यायले क्लियर हुन नसकेको कर्नरलाई गोलको दिशा दिएकी थिइन् ।

सुष्माले ७५ औं मिनेटमा सुन्दर गोल गर्दै फराकिलो जित पक्का गरिन् । उनले मिनाको क्रसलाई पहिलो टचमै गोलरक्षकको माथिबाट गोल गरेकी थिइन् ।

प्रतियोगिताको अन्तिम क्वाटरफाइनलमा मंगलबार एपिएफ फुटबल क्लब र पदमा स्पोर्ट्स क्लब खेल्नेछन् । विहीबार हुने सेमिफाइनलमा यस खेलको विजेता र रौतहट जिल्ला फुटबल संघ खेल्नेछन् । पहिलो सेमिफाइनलमा संकटा र पुलिस बुधबार खेल्नेछन् । संकटाले आर्मीलाई ३-१ ले हराएको थियो ।