एजेन्सी – वेस्ट ह्याम युनाइटेडले म्यानचेस्टर युनाइटेडलाई २-० ले हराउँदै फेब्रुअरीपछि प्रिमियर लिगमा पहिलो जित दर्ता गरेको छ।

ओल्ड ट्राफोर्डमा आइतवार भएको खेलमा टमास साउसेकले २६औं मिनेटमा मोहम्मद कुडुसको पासमा गोल गर्दै सिजनको नवौं गोल गरे।

कुडुसले हामर्सका लागि खेलभरि अवसर सिर्जना गर्न प्रयास जारी राखे । दोस्रो हाफको मध्यतिर जारोड बोवेनले बक्सभित्रबाट अर्को लो पासमा गोल गर्दै अग्रता दोब्बर बनाइदिए।

युनाइटेडले खेलको अन्त्यतिर कम्तीमा गोल फर्काउने प्रयास गर्‍यो । जहाँ रस्मुस होयलुनले केही अवसर पाए तापनि गोल गर्न असफल रहे।

यो सिजन युनाइटेडको घरेलु मैदानमा यो नवौं प्रिमियर लिग हार हो । जुन सन् १९६२ पछि पहिलो पटक भएको हो।

वेस्ट ह्यामले सन् २००७ पछि ओल्ड ट्राफोर्डमा पहिलो जित हासिल गरेको छ। साथै २००६/०७ सिजनपछि युनाइटेडविरुद्ध दुवै लेगमा जित‌ निकालेको छ।

यस जितसँगै वेस्ट ह्याम लिग तालिकामा १५औं स्थानमा उक्लिएको छ । युनाइटेड १६औं स्थानमा झरेको छ । अर्को खेलमा १० खेलाडीमा सीमित चेल्सीलाई २-० ले पराजित गर्दै न्युक्यासलले च्याम्पियन्स लिगको छनोटतर्फ एक कदम अघि बढ्यो।

न्युक्यासल अब ६६ अंकसहित चेल्सीभन्दा ३ अंकले अघि छ।  चेल्सी यो सप्ताहन्तपछि च्याम्पियन्स लिग स्थानभन्दा बाहिर रहन सक्छ।

अर्को खेलमा क्रिस्टल प्यालेसले टोटेनहमलाई २-० ले हराएको छ। नटिङ्घम फरेस्ट र लेस्टर सिटीले २-२ को बराबरी खेलेका छन्।