काठमाडौं (हाम्रो खेलकुद) – अखिल नेपाल फुटबल संघ (एन्फा) को अपिल कमिटीले सरस्वती युवा क्लबका खेलाडी धिरेन्द्र बहादुर शाहमाथिको निलम्बन फुकुवा गर्दै जारी शहीद स्मारक ‘बी’ डिभिजन लिग २०८१ मा सहभागी हुन अनुमति दिएको छ ।

यसअघि एन्फाको प्रतियोगिता समिति र अनुशासन समितिले शाहलाई प्रतिबन्ध लगाउने निर्णय गरेको थियो । तर सो निर्णयविरुद्ध परेको अपिलको आधारमा अपिल कमिटीले पहिलेको निर्णयहरूलाई बदर गर्दै शाहलाई पुनः खेल्न पाउने बाटो खुला गरिदिएको हो ।

साथै अपिल कमिटीले नयाँबस्ती युवा क्लब र सरस्वती युवा क्लबबीच भएको खेलमा प्रतियोगिता कमिटीले नयाँबस्तीको पक्षमा दिएको ३-० को नतिजा उल्टाउँदै सरस्वती युवा क्लबको पक्षमा निर्णय सुनाएको छ । उक्त खेल सरस्वतीले १-० ले जितेपनि समितिले नयाँवस्तीको पक्षमा निर्णय सुनाएको थियो ।

एन्फाको निर्णयअनुसार अब सरस्वती क्लबले उक्त खेलको जित आफ्नो पक्षमा पाउनेछ र धिरेन्द्र शाह पनि लिगमा सहभागी हुन पाउनेछन् ।

सरस्वती क्लबका अध्यक्ष उत्तमराज भण्डारीले आफूले फुटबलमा बिताएको ३५ वर्षको लामो करियरमा यो घटनालाई अहिलेसम्मको काहालीलाग्दो भएको हाम्रो खेलकुद डट कमलाई बताए । ‘विना कुनै कारण र दोष एउटा खेलाडी माथी गरिएको यो कारबाहीपछिको फुकुवा ठुलो चोटको मल्हम मात्र हो । यसको हिसाब किताब यतिमा मात्र सकिँदैन,’ भण्डारीले बताए ।

एन्फाको साधारण सभामा एएफसीका प्रतिनिधिसँग खेलाडीमाथि एन्फाले गरेको अन्यायको बारेमा जानकारी गराएर मात्र यो संभव भएको पनि भण्डारीले स्पष्ट पारे ।

अफिल कमिटीले के कारण शाहलाई निर्दोष करार दियो भनेर हामीले एन्फा प्रवक्ता सुरेश शाहलाई सोध्दा अफिल कमिटी स्वतन्त्र कमिटी भएकोले उनीहरूले यसको जवाफ दिन नपर्ने बताए । अपिल कमिटी अशोक कुमार पोखरेलको संयोजकत्वमा रहेको छ ।

निर्दोष खेलाडी शाहले लिगको ९ खेल गुमाए। उनलाई मानसिक असर पनि परेको कारण प्रशिक्षण पनि निरन्तर हुन नसकेको र आजको खेलमा केहि बेर खेल्न सक्ने क्लबका अध्यक्ष भण्डारीले बताए ।

यसअघि चैत्र ७ गते नयाँबस्ती युथ क्लबले शाहले दुई क्लब टुसाल र सरस्वती युथ क्लबसँग सम्झौता गरेको भन्दै उजुरी दर्ता गराएको थियो । त्यतिबेला एन्फाले दुवै क्लबसँग सम्झौता गरेको प्रमाण भेटिएको आरोपको आधारमा उनलाई लिगमा सहभागी हुन रोक लगाएको थियो ।