काठमाडौं (हाम्रो खेलकुद)- पूर्व अध्यक्ष गणेश थापाले
अखिल नेपाल फुटबल संघ (एन्फा) को साधारण सभामा सहभागी हुन रोक लगाइएपछि एन्फा अध्यक्ष पंकज विक्रम नेम्वाङकोविरुद्ध  अवहेलनाको मुद्दा दायर गरेका छन् ।

थापाको मुद्दामा सुनवाइ गर्दै उच्च अदालत पाटनले ७ दिनभित्र लिखित जवाफ दिन बिहीवार एन्फा अध्यक्ष नेम्वाङलाई आदेश दिएको छ ।

बैशाख २६ गते काभ्रेपलाञ्चोकको धुलिखेलमा भएको एन्फाको नियमित साधारण सभामा थापा र उनका छोरा गौरव थापालाई प्रवेशमा रोक लगाइएको थियो।

थापा सि डिभिजन क्लब आरसी ३२ र गौरव काठमाडौं जिल्ला फुटबल संघको प्रतिनिधिका रुपमा साधारण सभामा भाग लिन गएपनि उनीहरूलाई हलमा प्रवेश गर्न दिइएन ।

त्यसअघि उच्च अदालतले उनलाई साधारणसभामा भाग लिन पाउने रोक्नु नपर्ने आदेश गरे पनि एन्फाले त्यसलाई वेवास्ता गरेको थियो। त्यसैलाई आधार गरेर  थापाले अवहेलनाको मुद्दा हालेका हुन् ।

आफूलाई रोक लगाउने कार्यले सम्मानित उच्च अदालतबाट बैशाख २४ भएको अन्तरिम आदेशको अवज्ञा हुन गएको तथा अदालतको न्याय सम्पदन कार्यमा अवरोध हुनुका साथै सम्मानित अदालतको अवहेलना भएको थापाको निवेदनमा उल्लेख छ ।

एन्फाको अनुशासन समिति र इथिक्स कमिटीले थापा र उनका छोरालाई साधारण सभामा भाग लिन नदिने निर्णय गरेपनि उच्च अदालतले त्यसलाई अस्विकार गर्दै सभामा जान बाटो खोलेको थियो । तर, त्यो आदेशलाई एन्फाले अटेर गरेको थियो ।

पछि एन्फाले आरसी ३२ र काठमाडौं जिल्ला फुटबल संघलाई साधारण सभामा प्रतिनिधि किन नपठाएको भन्दै पत्राचार गरेको बताइएको छ।

आज उच्च अदालतका न्यायाधीशद्वय खडानन्द तिवारी र डिल्लीरत्न श्रेष्ठको संयुक्त इजलासले मुद्दामा सुनवाइ गर्दै ७ दिनभित्र एन्फा अध्यक्ष नेम्वाङको लिखित जवाफ मागेका हुन् । आफैं आएर जवाफ दिन वा कानुन बमोजिम प्रतिनिधिमार्फत लिखित जवाफ पेश गर्न आदेशमा भनिएको छ ।