काठमाडौं (हाम्रो खेलकुद) – प्रतिस्पर्धात्मक खेलमा बंगलादेशसँग पराजित हुँदै नेपाल साफ यु १९ च्याम्पियनसिपको सेमिफाइनलबाट बाहिरिएको छ ।

साविक विजेतासँग २–१ ले पराजित हुँदै नेपाल सेमिफाइनलबाट बाहिरिएको हो । खेलको अन्त्यतिर ३ गोल निस्कदा नेपालले बंगलादेशलाई नतिजा सुम्पियो ।
बंगलादेशका आशिखुर रहमान र कप्तान फैजलले गोल गरे । नेपालका सुजन डंगोलले एक गोल फर्काए ।

पहिलो हाफमा राम्रो प्रदर्शन गरेको साविकको उपविजेता नेपालले केही आक्रमण बुनेपनि गोलको खाता खोल्न सकेन । तर, खेलको अन्त्यतिर लय गुमाउँदा ९ मिनेटको अन्तरमा दुई गोल खान पुगेको थियो । लगत्तै एक गोल फर्काएपनि जितको लागि पर्याप्त बनेन ।

भारतको अरुणान्चलस्थित गोल्डेन जुबिली रंगशालामा शुक्रबार भएको खेलको ७३औं मिनेटमा आशिखुर रहमानले गोल गर्दै बंगलादेशलाई १–० को अग्रता दिलाए । कप्तान फैजलको कर्नरमा अनमार्क रहेका अग्ला कदका उनले हेडरमार्फत बललाई फारफोस्टको दिशा दिए ।

८१औं मिनेटमा कप्तान फैजलले गोल गर्दै बंगलादेशको अग्रता दोब्बर पारे । नेपाली रक्षक प्रशान्त मोत्तानले क्लियर गर्न नसकेको बललाई मनिकले नियन्त्रणमा लिदै आफैले गोल गर्न सक्ने स्थितिमा पनि कप्तान फैजललाई पास दिदा उनले कुनै गल्ती गरेनन् ।

८७औं मिनेटमा सुजनले गोल गर्दै खेललाई २–१ को स्थितिमा ल्याएर नेपाललाई खेलमा फर्काउने संकेत दिए । रन्जित लामाको क्रसमा सुजनले बक्सभित्रबाट सहजै गोल गर्न सफल भएका थिए । तर, त्यसपछि गोल नहुँदा नेपाल पराजित हुन पुग्यो ।

अब बंगलादेशले उपाधिका लागि भारत र माल्दिभ्सबीचको विजेतासँग खेल्नेछ । नेपालले सन् २०१५ मा भएको पहिलो संस्करण र २०१७ को यु १८ उमेर समूहको संस्करण जितेको थियो । पछिल्लो पटक भने नेपाल फाइनलमा बंगलादेशसँग पराजित भएको थियो ।