एजेन्सी – सानदार पुनरागमन गर्दै फुलहमले इङ्लिस प्रिमियर लिगमा ब्रेन्टफोर्डलाई ३-२ ले हराएको छ । योसँगै फुलहमले शीर्ष आठमा यो पटकको लिग सकाउने झिनो आशालाई कायमै राखेको छ।

आदामा ट्राओरेको क्रसमा राउल जिमेनेजको हेडर गोलमा फुलहमले १६ औं मिनेटमा अग्रता बनायो। तर यसको ६ मिनेटमै ब्रेन्टफोर्डका ब्रायन म्बुएमोले बराबरी गोल फर्काए।

खेलको २८ औं मिनेटमा प्राप्त पेनाल्टीमा ब्रायन म्बुएमोले गोल गर्न सकेनन। तर ४३ औं मिनेटमा फुलहमको डिफेन्सले क्लियर गर्न नसकेको बलमा क्रिस्टियन नोर्गार्डको हेडर पासलाई योने विसाले गोल गरे। यो सँगै ब्रेन्टफोर्डले पहिलो हाफमा २-१ को अग्रता बनायो।

दोस्रो हाफमा फुलहमले उत्कृष्ट कमब्याक गर्यो। ६८ औं मिनेटमा टम केर्नीले उत्कृष्ट हेडर गोल गरे। खेल २-२ को बराबरीमा पुग्यो। केर्नीको सम्झौता यस सिजनको अन्त्यमा सकिँदैछ र उनी लिग वान उपविजेता रेक्सह्यामसँग जोडिएका छन्।

त्यसपछि ७० औं मिनेटमा ह्यारी विल्सनले उत्कृष्ट कर्लिङ प्रहार सुन्दर गोलमा परिणत भयो। फुलहम ३-२ को जित निकाल्न सफल भयो।

फुलहमले ३७ खेलबाट ५४ अंक बनाएको छ। योसँगै क्लबको प्रिमियर लिग इतिहासमा सबैभन्दा बढी अंक जोड्ने कीर्तिमान पनि बनाउन सफल भयो। फुलहम लिगको दशौं स्थानमा रहेको छ। आठौं स्थानमा रहेको ब्रेन्टफोर्डसँग ५५ अंक छ।

अर्को खेलमा एभर्टनले लिगको पुछारमा रहेको साउथह्याम्पटनलाई २-० ले हरायो। उसको जितमा इलिमान एन्डायेले दुई गोल गरे। जितमा एभर्टनले ४५ अंक बनाएको छ।

यस्तै लेस्टर सिटीले इप्सविचलाई २-० ले माथ दिएको छ। दुवै टिम रेलिगेसनमा परिसकेका छन्।