सौरभ गिरी
नेपालगञ्ज– टाइब्रकेरमा विजयी हुँदै सिएमजी क्लब संकटा टुबोर्ग दोस्रो नेपालगञ्ज गोल्डकपको फाइनल पुगेको छ । साविक विजेता सुदूरपश्चिमाञ्चललाई पेनाल्टी सुट आउटमा ५–४ ले हराउँदै संकटा फाइनल पुगेको हो । जारी सिजनमा संकटा फाइनल पुगेको यो छैटौं नकआउट फुटबल प्रतियोगिता हो । यसअघिका ५ वटा फाइनल खेल्दा संकटाले तीन वटा उपाधि जितेको थियो ।
नेपालगञ्ज रंगशालामा इन्जुरी समयको चौथो मिनेटमा अनिल गुरुङले पेनाल्टीमा गोल फर्काएपछि संकटा खेलमा फर्केको थियो । आरोनले पेनाल्टी बक्समा बल ह्यान्ड गरेपछि संकटाले पेनाल्टी पाएको थियो । निर्धारित खेल १–१ को बराबरीमा टुंगिएपछि निर्णयका लागि खेल सोझै टाइब्रेकरमा गलिएको थियो ।
खेलको १७ औं मिनेटमा अब्दुलको गोलबाट अग्रता लिएको सुदूरपश्चिमाञ्चलले अन्तिम मिनेटमा गुमाएको थियो । सुदूर पश्चिमका लागि अफ्रिकी खेलाडी अब्दुल ,नरेन्द्र चौधरी र बिजय सिंहले मात्र गोल गरे । चेतन थारु ले प्रहार संकटाका गोलकिपरले रोके । अन्तिम मिनेटमा सुदूरपश्चिमाञ्चल १० खेलाडीमा सिमित भएको थियो । आरोनले रातो कार्ड खादै मैदान छोडेपछि सुदूरपश्चिमाञ्चलमा एक खेलाडी कम भएका थिए । संकटाले चैत ४ गते अग्नी रुपन्देही ११ र नेपाल पुलिस क्लबबीचको विजेतासँग फाइनल खेल्नेछ ।
संकटा यो बर्षको सर्वाधिक सफल टोलीमध्ये एक हो । चितवनमा विकास रनिङ शिल्ड जितेको संकटाले त्यसपछि रुस्लान सिमरा गोल्डकप र फागुन २१ गते तिलोत्तमा गोल्डकपको उपाधि जितेको थियो । संकटाले सुदूरपश्चिमाञ्चल खप्तड गोल्डकप र १९ औं बुढासुब्बा रेडबुल गोल्डकपको पनि फाइनल खेलेको थियो ।
बाँके जिल्ला फुटबल संघको आयोजनामा जारी प्रतियोगिता फाइनल चैत ४ गते हुनेछ । विजेताले उपाधि सहित ५ लाख र दोस्रो हुने टोलीले २ लाख ५१ हजार रुपैयाँ प्राप्त गर्नेछन् ।
टुबोर्ग नेपालगञ्ज गोल्ड कपमा मंगलबारको सेमिफाइनल
अग्नी रुपन्देहीविरुद्ध नेपाल पुलिस
