काठमाडौं (हाम्रो खेलकुद)– नेपाली मिडफिल्डर जगजित श्रेष्ठको अस्ट्रेलियन क्लब सनसाइन जर्ज क्रस एफसी फुटबल फेडेरेसन अस्ट्रेलिया कपको चौथो चरणमा पराजित भएको छ । शनिबार घरेलु मैदानमा भएको खेलमा साइनसाइन एक श्रेणीमाथिको शीर्ष टोली अभोनडेल एफसीसँग टाइब्रेकरमा ४–३ ले पराजित भएको थियो ।
निर्धारित ९० र थप ३० मिनेटमा पनि गोलरहित बराबरीमा टुंगिएपछि पेनाल्टी सुट आउटमा जगजितको टोली पराजित भएको हो । जगतिजले टाइब्रेकरमा पेनाल्टी हानेनन् । भिक्टोरिया स्टेटको नेसनल प्रिमियर लिगमा जगतिजको टोली तेस्रो स्थानमा रहेको छ ।
६ खेलमा ३ जित २ बराबरी र १ खेलमा हार बेहोरेको सनसाइनको ११ अंक छ । नर्थकोट सिटी एफसी १५ अंकसहित शीर्षस्थानमा छ भने दोस्रो स्थानको मोरल्यान्ड जेब्रास एफसीको ११ अंक छ । जगजितले सनसाइनका तीनै जितमा गोल गरेका थिए ।
