काठमाडौं (हाम्रो खेलकुद) – नेपालले एएफसी एसियन कप छनोटअन्तर्गत फिलिपिन्सविरुद्धको पहिलो खेल ४–१ ले गुमाएको छ ।खेल सुरु भएको केही मिनेटमै दस खेलाडीमा सिमित भएको नेपालले पहिलो हाफमा ३ र दोस्रो हाफमा १ गोल खाएको थियो । नेपालका लागि एकमात्र गोल विशाल राईले पहिलो हाफको इन्जुरी समयमा फर्काएका थिए ।

खेलको १२ औं मिनेटमा पेनाल्टी बक्समा विक्रम लामाले बल ह्यान्ड गरेका कारण रातो कार्ड पाएपछि नेपाल दस खेलाडीमा सिमित भएको थियो । त्यसमा फिलिपिन्सले पेनाल्टी पाएपछि नेपाली गोलकिपर किरण चेम्जोङ त्यसलाई रोक्दै टोलीको मनोबल बढाएका थिए । तर, त्यसपछि फेरी २१ औं मिनेटमा प्राप्त पेनाल्टीलाई फिलिपिन्सका खेलाडी योङ हस्बेन्डले गोलमा परिणत गर्दै खेलमा अग्रता दिलाएका थिए ।

२३ औं मिनेटमा योङले अर्को गोल थपे । २८ औं मिनेटमा लियान्ड रामजेले अर्को गोल थप्दै खेलमा फिलिपिन्सको पकडलाई बलियो बनाएका थिए । इन्जुरी समयको दोस्रा मिनेटमा विशालले गोल फर्काउँदै झिनो आशा दिलाएका थिए । एकपक्षिय रुपमा फिलिपिन्स हावी भएको खेलको ७२ औं मिनेटमा जाभियर पाटिनोले दुई नेपाली रक्षकलाई छलाउँदै पेनाल्टी बक्सको बाहिरबाट गोल गरेका थिए । ८७ औं मिनेटमा रामजेको सिक्स यार्ड बक्सबाट गरेको प्रहारलाई आदित्य चौधरीले गोललाइनबाट क्लियर गरेका थिए । ८८ औं मिनेटमा नेपालले गोलको मौका पाएपनि गोल भएन ।

सुजल श्रेष्ठको कर्नरमा अनन्त तामाङ हेडर फिलिपिनो गोलकिपरले बचाए । इन्जुरी समयको पहिलो मिनेटमा रविन श्रेष्ठ विपक्षी मिडफिल्डरसँग ठोक्किएर घाइते भएपछि नियमित कप्तान विराज महर्जन मैदान प्रवेश गरेका थिए । विराजले सुरुआती ११ मा मौका नपाउदा भरत खवासले नेपाली टोलीको कप्तानी गरेका थिए ।

विश्व कप र एसियन कप एकै मनिएको छनोटको पहिलो चरणमै बाहिरिएको नेपालले गत कार्तिकमा एएफसी सोलिडारिटी कप जितेपछि एकै पटक तेस्रो चरणमा खेल्ने मौका पाएको थियो । सोलिडारिटी कपको विजेता र ग्वामले छनोट खेल्न नपाएका कारण एसियाली फुटबल महासंघ (एएफसी) ले नेपाललाई छनोट चरण खेल्ने मौका फेरी एक पटक दिएको थियो ।

झन्डै दुई बर्षयता उमेर समूह र राष्ट्रिय टोलीले गरि चार उपाधि जितेको नेपालका लागि एसिया कप छनोटको तेस्रो चरण अहिले सम्मकै ठूलो प्रतिस्पर्धाका रुपमा रहेको छ । नेपाल रहेको समूहमा रहेका फिलिपिन्स, यमन र ताजकिस्तान छन् । फिलिपिन्स नेपालका लागि कठिन प्रतिद्वन्द्वि रहँदै आएको छ । ३५ बर्षयता नेपालले फिलिपिन्सलाई हराउन सकेको छैन ।

सन् १९८२ मा फिलिपिन्सलाई १–० ले हराएको नेपालले त्यसपछिका तीनै खेल गुमाएको छ । २०११ को अक्टुबरमा ४–० तथा २०१४ को अप्रिल र अक्टुबरका दुई खेलमा नेपालले समान ३–० को नतिजा सुम्पेको थियो । झन्डै तीन बर्षपछि नेपालले फिलिपिन्सको सामना गरेको थियो ।