सर्लाही (हाम्रो खेलकुद)– लक्ष्मी हुन्डाई मनाङ मस्र्याङ्दीले राजर्षि जनक कप फुटबल प्रतियोगिताको उपाधि जितेको छ । विभागिय टोली त्रिभुवन आर्मी क्लबलाई बुधबार १–० ले हराउँदै दस खेलाडीमा सिमित मनाङले फाइनल जितेको हो । योसँगै मनाङ घरेलु फुटबलमा जारी सिजनमा नकआउट फुटबलको सर्वाधिक उपाधि जित्ने टोली बनेको छ । यो टोलीको चौथो उपाधि हो । आर्मी र सिएमजी क्लब संकटाले समान ३ उपाधि जितेका छन् ।

४९ औं मिनेटमा विमल रानाले गरेको गोल मनाङलाई बर्षको चौथो उपाधि दिलाउनका लागि पर्याप्त रह्यो । खेलको अन्त्यतिर दस खेलाडीमा सिमित भएपनि मनाङ अग्रता जोगाइ राख्न भने सफल भयो । विवेक बस्नेतले ७६ औं मिनेटमा दोहोरो पहेलो कार्डसँग रातो कार्डपाएपछि मैदान छोडेका थिए ।

टोलीका नियमित आठ खेलाडी राष्ट्रिय टोलीमा हुँदा पनि मनाङ आर्मीलाई हराउन सफल भएको छ । मनाङले उपाधिसहित ४ लाख रुपैयाँ र आर्मीले २ लाख रुपैयाँ प्राप्त गरेका थिए । मनाङलाई यसअघि पुसमा टुबोर्ग हेटौडा गोल्ड कप फुटबल प्रतियोगिताको फाइनलमा भने आर्मीले हराएको थियो । आर्मीले त्यसअघि चितवनमा नेपाल कप र दुहबी गोल्ड कपको उपाधि जितेको थियो ।

हेटौडा गोल्ड कपपछि आर्मीले कुनै उपाधि जितेको छैन । हेटौडापछि लगत्तै सुदूरपश्चिमाञ्चलको खप्तड गोल्ड कपको उपाधि जितेको मनाङले त्यसपछि लगातार पोखरामा आहा रारा गोल्ड कप र झापामा रमपम झापा गोल्डकप फुटबल प्रतियोगिताको उपाधि जितेको थियो ।

संकटाले चितवनमा विकास रनिङ शिल्ड, रुस्लान सिमरा गोल्ड कप र रुपन्देहीमा तिलोत्तमा गोल्ड कप उपाधि जितेको थियो । राजर्षिमा भने संकटा पहिलो खेलमै पराजित भएको थियो । बागमति युवा क्लबले आयोजना गरेको राजर्षि जनक कपमा ७ ए डिभिजन क्लब र बी डिभजन टोली ब्वाइज युनियन क्लबको सहभागिता थियो ।