दिपक बोहोरा
इलाम – इलाममा जारी टुबोर्ग तेस्रो माईभ्याली गोल्ड कपमा फुटबल प्रतियोगितामा आज विभागिय टोली त्रिभुवन आर्मी क्लबले भारत कञ्चनजङ्गा फुटबल क्लब सिलगुढीको सामना गर्दैछ । यस अघि भारतकै ग्लोबल फुटबल क्लब आउने भनिएपनि प्राविधिक कारण देखाउँदै नआएपछि कञ्चनजङ्गालाई बोलाइएको सह आयोजक जिल्ला फुटबल संघ इलामका अध्यक्ष निरज खड्कीले जानकारी दिए ।
यसै साता राजर्षि जनक कप फुटबल प्रतियोगिताको फाइनल खेलेर आर्मी इलाम पुगेको हो । यो सिजन आर्मीले तीनवटा नकआउट फुटबल प्रतियोगिता जितेको थियो । चितवनमा नेपाल कप, दुहबी गोल्ड कप र त्यसपछि पुसमा हेटौडा गोल्डकप जितेपछि टोलीले कुनै उपाधि जितेको छैन ।
सुरुआती दुई दिनमा नेपाल पुलिस क्लब र अग्नी रुपन्देही ११ विजयी हुँदै प्रतियोगिताको अन्तिम आठमा पुगिसकेका छन् । २६ गते सम्म चल्ने प्रतियोगिताको विजेताले उपाधि ४ लाख रुपैयाँ प्राप्त गर्नेछ ।
