काठमाडौं,२५-
रेडबुल राष्ट्रिय लिग अन्तिम अन्तिम चरणमा पुग्दा विभागिय टोली त्रिभुवन आर्मी क्लब आज पुनः अंकतालिकाको शीर्षस्थानमा उक्लने सम्भावना छ । पछिल्लो दुई खेलमा ७-० को जित निकालेको आर्मीले आज २ः३० मा तुलानात्मक रुपमा सहज प्रतिद्धन्द्धि जगदम्बा लुम्बिनी फुटबल क्लबको सामना गर्दैछ ।
आर्मीका नवयुग श्रेष्ठ- फाइल तस्बिर
लिगको त्रिपक्षिय भिडन्तमा अब रुस्लान थ्री स्टार, लक्ष्मी हुन्डाई मनाङ मर्श्याङ्दी र आर्मी मात्र रहेका छन् । १४ चरणको खेल सकिदा यी तीन टोलीबीच एक एक अंकको अन्तर छ । थ्री स्टारको २९, मनाङको २८ र आर्मीको २७ अंक छ । आर्मीले अन्तिम खेलमा अर्को विभागिय टोली पुलिससँग प्रतिस्पर्धा गर्नेछ । थ्री स्टार र मनाङले लिगको अन्तिम दिन एकअर्काको सामना गर्नुअघि एक एक खेल खेल्नुपर्नेछ । थ्री स्टारले बाँकी दुवै खेल जिते स्वतः यो बर्षको लिग च्याम्प्यिन हुनेछ । शीर्ष तीन टोलीले बराबरीमा रोकिए वा हार खेप्नुपरेमा अन्य खेलका नतिजाको अर्थ हुन सक्छ । खराब प्रदर्शन गरेको लुम्बिनी १५ खेलमा ८ अंकसहित पुछारबाट दोस्रो स्थानमा छ ।
