रेडबुल राष्ट्रिय लिग अन्तर्गतको खेलमा आज थ्रीस्टारले ए.पी.एफको सामना गर्दैछ|
सातदोबाटो स्थित एन्फा कम्प्लेक्सको एष्ट्रो टर्फ मैदानमा हुने खेलमा थ्रीस्टार जित हात पारे शिर्ष स्थानमा जानेछ भने अंक गुमाएको खण्डमा उपाधि होडमा आर्मी र मनाङलाई केहि फाइदा हुनेछ| ए.पी.एफ. भने सुदुरसंग हार ब्येहोरेसंगै लिग उपाधि होडबाट बाहिरिसकेको छ| थ्री स्टारका लागि यस खेलमा कप्तान सागर थापाले दुइ खेलपछि पुनरागमन गर्ने छन् भने सन्दिप राई दोहोरो पहेंलो कार्डका कारण मैदानमा उत्रने छैनन्| सागरलाई एन्फाको अनुशासन कमिटीले आर्मीबिरुद्धको खेलमा रेफ्रीलाई अपशब्द प्रयोग गरेको भन्दै एक खेल निलम्बन गरेको थियो भने दोहोरो पहेंलो कार्डका कारण एक खेल गुमाएका थिए|
शिर्ष तिन स्थानबाट आफुलाई टाढा बनाइसकेका प्रशिक्षक कृष्ण थापाको टोलीमा आज जङ्गबु शेर्पा देखिने छैनन्| सुदुर बिरुद्धको खेलमा उनले जारी लिगको दोश्रो पहेंलो कार्ड खाएका थिए| यस्तै डिफेन्डर मन बहादुर तामाङ सुदुर बिरुद्धको खेलमा बिमल घर्ति मगरको ट्याकलले गर्दा घाइते भएका कारण यस खेलमा उपस्थिति जनाउने छैनन्|
सन्तोष शाहुखल सम्पर्कबिहिन रहेको र अमर डंगोल र अफीजले चोट बोकेको अवस्थामा थ्री स्टारका प्रशिक्षक राजेन्द्र तामाङले एक स्ट्राइकर मात्र उतार्न सक्नेछन| २८ अंक बोकेर दोश्रो स्थानमा रहेको थ्री स्टारले २९ अंक भएको आर्मी भन्दा एक खेल कम खेलेको छ| आर्मी र थ्री स्टार समान अंक भएको खण्डमा हेड-टू-हेडका आधारमा थ्री स्टार माथि हुनेछ|
