रेडबुल राष्ट्रिय लिग अन्तर्गत आज हुने खेलमा लक्ष्मी हुन्डाई मनाङ मर्स्याङ्दि क्लब र नेपाल पुलिस क्लब आमने सामने हुँदैछन्|
फाइल तस्वीर – मनाङका डोडोज (बायाँ) र विशाल राई ।
लिगको अंक तालिकाको तेश्रो स्थानमा रहेको मनाङ, यस खेलमा हार व्यहोरे उपाधि दौडबाट बाहिर हुनेछ| पुलिसलाई भने आजको हारजितले अंक तालिकामा केहि फरक पर्ने छैन| आज जित हात पारे मनाङ आर्मीलाई पछि पार्दै दोश्रो स्थानमा पुग्न सफल हुनेछ|
मोरङविरुद्धको पछिल्लो खेलमा चार सुरुवाति रोजाइका खेलाडिलाई विश्राम दिएको मनाङले यस खेलमा सबै चार खेलाडीलाई मैदानमा उतार्नेछ| दिपक राई, विशाल राई, मुसा फिनिगे र विराज महर्जनले टोलीमा पुनरागमन गर्नेछन्| पछिल्लो खेलमा ह्याट्रिक गरेका रवि पासवान बेन्चमा नै बस्नेछन्|
मोरङ संगै आफ्नो पछिल्लो खेल खेलेको पुलिस एक हप्ताको विश्रामपछि मैदानमा उत्रदैं छ| अन्तिम दुई खेलनै उपाधिका दावेदारहरुसंग रहेको हुनाले अझैपनि लिगमा पुलिसको भुमिका पनि ठुलै छ| थ्रिस्टार लाई एकमा जित र अर्कोमा बराबरी गरेको पुलिस मनाङसंग पनि त्यस्तै नतिजा निकाल्ने दाउमा हुनेछ| यसअघिनै पुलिसका प्रशिक्षक विराटकृष्ण श्रेष्ठले उपाधि दौडमा रहेका टोलीलाई पुलिस विरुद्ध खेल्न सहज नहुने बताउँदै आएका थिए|
