एजेन्सी – स्पेनिस ला लिगा अन्तर्गत बुधबार राती हुने खेलमा रियल म्याड्रिडले घरेलु टोली डेपोर्टिभो ल कोरुनाको सामना गर्दैछ।
एल-क्लासिकोमा भोगेको पराजयसंगै लिगको दोश्रो स्थानमा पुगेको म्याड्रिड जित दर्ता गरेर बार्सिलोनामाथि दबाब सिर्जना गर्ने धुनमा हुनेछ। बार्सिलोनाको तुलनामा १ खेल कम खेलेको रियल समान अंक बोकेर अंक तालिकाको दोश्रो स्थानमा रहेको छ।
एल-क्लासिकोमा रातो कार्ड पाउँदै मैदान छाडेका सर्जियो रामोस प्रतिबन्धका कारण यस खेलमा खेल्न पाउने छैनन्। उनको स्थानमा चोटबाट फर्किदै गरेका राफेल भारानेले खेल्नेछन्। अर्का डिफेन्डर पेपे पनि घाइते भएको अवस्थामा म्याड्रिडले नाचो फर्नान्डेज र भारानेको जोडीलाई प्रयोग गर्नेछ। ग्यारेथ बेल पनि चोटका कारण यस खेलमा देखा पर्ने छैनन्।
रियलले डेपोर्टिभो विरुद्धको पछिल्लो ८ खेलमा जित हात पारेको छ। यी २ टोलीबिचको पछिल्लो ८ खेलमा म्याड्रिडले डेपोरलाई प्रत्यक खेलमा कम्तिमा २ गोल हानेको छ। लिग तालिकाको १६औं स्थानमा रहेको डेपोर्टिभो यस खेलमा अनुकुल नतिजा निकालेर रेलिगेसनको डरबाट मुक्त हुने धुनमा हुनेछ।
