राकेश तिमल्सिना
चितवन – चितवन जिल्ला लिगको फाइनलमा फेरी पनि एनएफसी र एभरेष्ट क्लबबीच प्रतिस्पर्धा हुने भएको छ । भरतपुर फुटबल क्लब (बिएफसी) लाई बिहीबार २–० ले हराउँदै एभरेष्टले एनएफसीसँगको भेट पक्का गरेको हो । साविक विजेता एनएफसी यसअघि नै फाइनल पुगिसकेको छ ।
नारायणगढको क्याम्पाचौर बिहीबार एभरेष्टलाई जित दिलाउन सुरज सेन्चुरी र देव गुरुङले गोल गरे । खेलको १० औँ मिनेटमा सुरजले झन्डै २० यार्ड टाढाबाट गोल गर्दै अग्रता दिलाएका थिए । परिवर्तित खेलाडी देवले ४९ औं मिनेटमा गोल थपेका थिए । देवले मैदान प्रवेश गरेको पहिलो मिनेटमै गोल गरेका थिए । गतवर्षको फाइनलमा एभरेष्टलाई १–० ले हराउँदै एनएफसीले उपाधि जितेको थियो ।
चितवन जिल्ला फुटबल संघले आयोजना गरेको जिल्ला लिगको फाइनल शनिबार हुनेछ । यसैबीच, शुक्रबार जयमंगला र बसन्तपुरको महिला टोलीबीच मैत्रीपूर्ण खेल हुने आयोजक जिल्ला संघले जनाएको छ ।
