म्याड्रिड (एजेन्सी) – स्पेनिस ला लिगा अन्तर्गत आइतबार राती भएको खेलमा रियल म्याड्रिडले आफ्नो घरेलु मैदानमा भएको खेलमा ४-१को जित हात पारेको छ।
खेलको १०औं मिनेटमा नाचो फर्नान्डेजको गोलमा रियलले अग्रता बनाएको थियो। मार्को एसेन्सियोलाई फल हानेपछि पाएको फ्रिकिकलाई उनले चाडैं गोलको दिशा दिंदा सेभिल्लाका गोलरक्षकले मुकदर्शक बनेका थिए। खेलको २३औं मिनेटमा क्रिस्टियानो रोनाल्डोले गोल गर्दै खेलमा रियलको अग्रता दोब्बर पारे।
दोश्रो हाफको सुरुवातमै स्टेफन योभेटिचले भिटोलोको पासलाई सदुपयोग गर्दै खेलमा सेभिल्ला फर्कने संकेत दिएका थिए। तर, रोनाल्डोले ७८औं मिनेटमा व्यक्तिगत दोश्रो गोल गर्दै खेलमा २ गोलको अग्रता पुन:स्थापना गरे। टोनी क्रुसले ८४औं मिनेटमा गोल गर्दै म्याड्रिडको जित सुनिश्चित गरेका थिए।
जितसंगै बार्सिलोना र रियल अंक तालिकामा समान अंक लिएर क्रमश: पहिलो र दोश्रो स्थानमा छन्। रियलले बार्सिलोनाको तुलनामा १ खेल कम खेलेको छ।
