म्यानचेस्टर (एजेन्सी) – ट्रान्सफर विन्डो सुरु भए लगतै म्यानचेस्टर युनाइटेड आफ्नो टोली मजबुत बनाउन प्रयासमा लागिसकेको छ। प्रिमियर लिगमा छैठौं स्थानमा रहेर सिजन समाप्त गरेपनि युरोपा लिग जित्दै च्याम्पियन्स लिगमा स्थान बनाउन सफल युनाइटेडको नाम एक पछि अर्को खेलाडीसँग जोडिने क्रम जारि छ।
रियल म्याड्रिडबाट राफेल भारानलाई ओल्ड ट्राफर्डमा ल्याउन जोसे मोउरिन्हो प्रयासरत रहेको जानकारी स्काई स्पोर्ट्सले दिएको छ । सन् २०११ मा रियलका म्यानेजर रहेका मोउरिन्होको पहलमा फ्रान्सको लेन्सबाट रियल आएका भारानले पुनः मोउरिन्होसँग सहकार्य गर्न सक्ने सम्भावना देखिएको छ ।
युनाइटेडले गोलकिपर डेभिड डे ह्यालाई किन्ने रियलको ६० मिलियन पाउन्डको प्रस्ताव अस्विकार गरेपछि युनाइटेडलाई भारान भित्राउन केहि समस्या आउन सक्ने अनुमान लगाईएको छ । तर भरानको विकल्पमा युनाइटेडले साउथह्याम्प्टनका भिर्जिल भान जीक, बर्नलीका माइकल किन र बेन्फिकाको भिक्टर लिन्डलाफलाई पनि निगरानीमा राखेको छ ।
गत सिजन एरिक बेलीलाइ भित्र्याएको युनाइटेडले फिल जोन्सलाई भने क्लब छाडेर जान दिने बुझिएको छ। क्लबले क्रिस स्मलिङ, मार्कोस रोहो, एरिक बेलीसँग साथ दिन अझै अर्का एक डिफेन्डरलाइ क्लबमा भित्र्याउने प्रयास गरेको हो।
