काठमाडौं (हाम्रो खेलकुद)– अस्ट्रेलियामा व्यवसायिक फुटबल खेलाडी रहेका नेपाली मिडफिल्डर जगजित श्रेष्ठ नुनावडिङ सिटी एफसीमा आबद्ध भएका छन् । गत माघमा एनपिएलको अर्को टोली सनसाइन क्रस एफसीमा आबद्ध भएका जगजित हिजो नयाँ क्लब नुनावडिङमा आबद्ध भएका हुन् ।
सम्झौतापछि जगजित क्लबका सहायक प्रशिक्षक निक डिभिट्राकिससँग ।
अब उनी बाँकी सिजन अक्टोबर सम्म त्यस क्लबमा रहनेछन् । ट्रान्फर विन्डोको अन्तिम दिन बुधबार नयाँ क्लबमा आबद्ध भएको जगजितले हाम्रो खेलकुद डटकमलाई जानकारी दिए । नुवााडिङ पनि सोही लिग खेल्ने क्लब हो । सनसाइनमा भन्दा सेवा सुविधा राम्रो भएकोले नयाँ क्लबमा आबद्ध भएको जनाएपनि जगजितले सम्झौता रकम भने खुलाइन चाहेनन् ।
‘मैले सनसाइनमा राम्रो खेलेकै देखेर यो क्लबले बोलाएको हो ’ जगजितले भने, ‘नयाँ क्लबमा आबद्ध हुँदा उत्साहित छु । अवसरसँगै चुनौति थपिएको छ । यहाँ राम्रो गर्न सके भने अझै अर्को क्लबका लागि बाटो खुल्न सक्छ ।’ उनले आइतबार नयाँ क्लबबाट ‘डेब्यू’ू गर्ने बताएका छन् । अस्ट्रेलियमा जगजितको यो तेस्रो क्लब हो ।
गत बर्षको सुरुआत तिर अस्ट्रेलिया पुगेका जगजितले साउनमा भिक्टोरिया स्टेटको बी डिभिजन टोली ह्युम युनाइटेड एफसीबाट तीन महिना खेलेका थिए । त्यति बेला उनले १ हजार ५ सय अमेरिकी डलर मासिक पारिश्रमिक लिन्थे । माघमा उनी सनसाइनमा जाँदा पहिलाको भन्दा राम्रो पारश्रमिक पाएको बताएका थिए ।
केही बर्षअघि हिमालयन शेर्पाको पहलमा उनी जर्मनी गएर केही साताको अभ्यास गरेर फर्केका थिए ।नेपालले दुई बर्ष दुई महत्वपूर्ण उपलब्धी हासिल गर्दा जगगित पनि टोलीका सदस्य थिए । २०७२ को फागुनमा भारतमा १२ औं दक्षिण एसियाली खेलकुद (साग) मा यू २३ ले स्वर्ण पदक जित्नुअघि राष्ट्रिय टोलीले माघमा बंगलादेशमा बंगबन्धु गोल्डकप जित्दा जगजित टोलीमा थिए । गत बर्षले नेपालले एएफसी सोलिडारिटी कप जित्दा भने उनी टोलीमा थिएनन् ।
