एजेन्सी – स्पेनिस टोली बार्सिलोनाका मिडफिल्डर आर्डा टुरानले आफ्नो करार अवधि रहुन्जेल बार्सिलोना नछाड्ने बताएका छन्। ३० वर्षीय टर्कीस मिडफिल्डरलाई आर्सनलले क्लबमा भित्र्याउने प्रयास गरेको थियो।
सन् २०१५को जुलाई महिनामा एट्लेटिको छाडेर बार्सा आएका टुरानले बार्सिलोनाको ट्रान्सफर प्रतिबन्धका कारण ६ महिना मैदानबाहिर रहनुपरेको थियो। गत सिजन ३० खेलमा १३ गोल गरेका टुरानले १४ खेलमा सुरुवात गरेका थिए। उनको करार सन् २०२० सम्म रहेको छ।
बार्सिलोनामा नयाँ प्रशिक्षकको आगमनसँगै टुरानले थप मिहिनेत गरेर सुरुवाती ११मा स्थान बनाउने बताएका छन्। राष्ट्रिय टोलीबाट पछिल्लो महिना सन्न्यास लिएका टुरान अब क्लब करियरमा ध्यान दिन चाहन्छन्। उनले गत सिजन चोटका कारण केहि समय मैदान बाहिर बिताएका थिए।
करारमा अझ ३ वर्ष बाँकी रहेको हुँदा टुरान क्लबमै रहेर खेल्ने उनले बताए। टुरान १२ जुलाईबाट प्रशिक्षणमा सहभागी हुदैंछन्। मेस्सीले नयाँ करार सम्झौता गरेसँगै टुरानले पनि बार्सालाई वचन दिंदा प्रशिक्षक भालभेर्डेलाई थप प्रेरणा मिलेको छ।
