एजेन्सी – स्पेनिस क्लब सेभिल्लाका कप्तान भिसेन्टे इबोर्रालाई इङ्गलिस प्रिमियर लिग क्लब लेस्टर सिटिले अनुबन्धित गरेको छ। २९ वर्षीय डिफेन्सिभ मिडफिल्डरलाई भित्र्याउन लेस्टरले करिब १५ मिलियन पाउण्ड खर्चिएको अनुमान गरिएको छ।
गत सिजन ला लिगामा ३१ खेल खेलेका इबोर्राले ७ गोल र २ असिस्ट प्रदान गरेका थिए। उनको प्रेरणादायी प्रदर्शनमा सेभिल्लाले लिगमा चौथो स्थान प्राप्त गर्दै च्याम्पियन्स लिगमा स्थान बनाएको थियो। सन् २०१३मा लेभान्तेबाट सेभिल्ला आएका इबोर्राले लगातार ३ युरोपा लिग उपाधि जितेका थिए। उनले सेभिल्लाका लागि करियरमा १ सय ७२ खेल खेल्दै ३० गोल प्रहार गरेका थिए।
स्पेनिस मिडफिल्डरलाई अनुबन्धित गरेपछि लेस्टरका प्रशिक्षक क्रेग सेक्सपियरले हर्षित भएको बताए। ‘उनले स्पेनमा रहँदा सेभिल्लालाई राम्रो प्रदर्शन गर्दै महत्वपूर्ण उपाधि पनि दिलाएका छन्। उनको उपस्थितिले हाम्रो टोलीमा थप प्रतिस्पर्धा बढ्नेछ।’
इबोर्राले पनि लेस्टरमा आएर प्रिमियर लिग खेल्न पाउँदा खुसि भएको बताए। ‘म प्रिमियर लिग खेल्न पाउँदा निकै उत्साहित छु। यस क्लबका बारेमा मैले सबै राम्रो चुनेको छु र छिट्टै मैदानमा उत्रन आतुर छु।’
