एजेन्सी – स्पेनिस राष्ट्रिय टोलि एवं बार्सिलोनाका मिडफिल्डर सर्जियो बुस्केट्सले आफ्नो पोजिसनमा खेल्ने खेलाडीमा रियल म्याड्रिडका क्यासेमिरो सर्वोत्कृष्ट रहेको अभिव्यक्ति दिएका छन्। गत सिजन रियल म्याड्रिडले च्याम्पियन्स लिग र स्पेनिस लिग जित्दा क्यासेमिरोले राम्रो प्रदर्शन गरेका थिए।
बुस्केट्सलाई विश्वका ५ उत्कृष्ट डिफेन्सिभ मिडफिल्डरको नाम सोध्दा उनले सुरुमै क्यासेमिरोको नाम लिंदै उनले निकै राम्रो प्रदर्शन गरिरहेको बताए। ‘क्यासेमिरो निकै भरपर्दा खेलाडीको रुपमा आफुलाई उभ्याउन सफल रहिसकेका छन्। उनले गत सिजन म्याड्रिडको जितमा महत्त्वपूर्ण भूमिका खेलेका थिए।’
क्यासेमिरोपछि उनले भिल्लारियलबाट खेलिरहेका मिडफिल्डर ब्रुनोको नाम लिए। त्यसपछि उनले प्रिमियर लिगमा खेल्दै आएका स्पेनिस मिडफिल्डर आन्देर हर्रेरा र चेल्सीका एनगोलो कान्टे र नेमान्जा माटिचको नाम लिए।
बार्सिलोना र रियल म्याड्रिड सिजनको सुरुवातमा हुने स्पेनिस सुपर कपमा आमने सामने हुँदैछन्। पहिलो लेग अगष्ट १२मा खेलिनेछ भने दोश्रो लेग २ दिनपछि १५ अगष्टमा हुनेछ।
