एजेन्सी – फ्रान्सेली टोली पेरिस सेन्ट जर्मेनले मोनाकोका युवा फरवार्ड किलियन बाप्पेलाई भित्र्याउन नसकेको खण्डमा लिभरपुलका फिलिप कुटिन्होलाई ल्याउने भएको छ। म्याड्रिड र पेरिसबीच बाप्पेलाई भित्र्याउन प्रतिस्पर्धा चलिरहे पनि मोनाकोले भने उनलाई कुनै हालतमा नबेच्ने जनाउँदै आएको छ।
१९ वर्षीय बाप्पेलाई क्लबमा ल्याउन नसकेको खण्डमा पिएसजीले ब्राजिलियन राष्ट्रिय टोलीक मिडफिल्डर कुटिन्होलाई भित्र्याउने भएको हो। सन् २०२२ सम्म लिभरपुल रहने निर्णय लिएर गत वर्ष मात्र नयाँ सम्झौता गरेका कुटिन्होलाई भित्र्याउन ९० मिलियन युरोसम्म खर्च गर्नुपर्ने पिएसजीको बुझाई छ।
यता लिभरपुलले भने उनलाई बेच्दा अर्को खेलाडी किन्न पर्याप्त समय बाँकी रहे मात्र ब्राजिलियन मिडफिल्डरलाई जना दिने सम्भावना छ। उनको सम्झौतामा कुनै किसिमको रिलिज कलज नरहेकाले लिभरपुलले अझै धेरै रकमको माग गर्ने सम्भावना पनि उत्तिकै छ।
मोनाकोले बाप्पेलाई क्लबमै राख्ने ठुलो प्रयास गरेको फुटबल जानकार बताउँछन्। पेरिस र म्याड्रिडका क्लबले १०० मिलियन भन्दा बढीको प्रस्ताव राखिसकेको र मोनाकोले दुवैलाई नकारेको फ्रान्सेली मिडियाले जनाएका छन्। उनलाई क्लबमा भित्र्याउन म्याड्रिडले १ सय २० मिलियन युरोको प्रस्ताव राख्ने बुझिएको छ।
