एजेन्सी – गतसाता मात्र म्यानचेस्टर युनाइटेड बाट एभर्टन पुगेका वायन रुनीले आफ्नो डेब्यु खेलमै उत्कृष्ट गोल गर्दै आफ्नो दोश्रो पटकको एभर्टन यात्राको सुरुवात गरेका छन्। केन्याली च्याम्पियन गोर माहियासँग तान्जानियाको रंगशालामा खेलिएको खेलमा रुनीले करिब ३० यार्ड टाढाबाट खेलको पहिलो गोल गरेका थिए।
प्रि-सिजनको खेलमा व्यस्त रहेको एभर्टनसँग रुनी नयाँ सिजनको तयारीमा लागेका छन्। रुनीले पहिलो पटक एभर्टनबाट सन् २००२मा डेब्यु गर्दा पनि आर्सनल विरुद्ध यस्तै किसिमको गोल मार्फत आफ्नो खाता खोलेका थिए। उनि युनाइटेडबाट खेल्दै क्लब र देशका लागि सर्वाधिक गोलकर्ता बन्न सफल रहेका थिए।
रुनीसँगै एभर्टनले यस सिजन अन्य नयाँ खेलाडीहरु पनि भित्र्याएको छ। आयाक्सबाट मिडफिल्डर डाभी क्लासेन, सन्डरल्याण्डका गोलरक्षक जोर्डन पिक्फर्ड, बर्नलीका माइकल किन र बार्सिलोनाका पूर्व-फरवार्ड स्यान्ड्रो रामिरेज पनि एभर्टन आइपुगेका छन्।
