काठमाडौं (हाम्रो खेलकुद)– ए डिभिजन लिग, रुस्लान थ्री स्टारको क्षतिपूर्ति, विशेष साधारण सभालगायतका विषयमा छलफल गर्न अखिल नेपाल फुटबल संघ (एन्फा) ले अर्को साता कार्यसमितिको बैठक बोलाएको छ ।
अध्यक्ष अध्यक्ष नरेन्द्र श्रेष्ठ । फाइल तस्बिर
९ वटा एजेन्डासहित साउन ११ गतेका का लागि बैठक डाकिएपनि मुख्यतः तीनवटा विषयमा छलफल हुने एन्फाका प्रमुख कार्यकारी अधिकृत इन्द्रमान तुलाधरले जानकारी दिएका छन् । ‘सबै विषय उत्तिकै महत्वपूर्ण छन् । तर मुख्य यी तीन विषयले छलफलमा बढी समय लिन सक्छ,’ तुलाधरले भने,‘लिग हामी जसरी पनि सन् २०१७ मै सुरु गर्न चाहन्छौं । त्यसअघि थ्री स्टारको विषय पनि टुंगाउनु पर्नेछ । अर्को एसियाली फुटबल महासंघ (एएफसी) को निर्देशन अनुसार विशेष साधारण सभाको मिति पनि तय गर्नुछ ।’
विशेष साधारण सभा गर्ने विषयमा एन्फाभित्र खासै विवाद देखिएको छैन । तर, लिग सञ्चालन र थ्री स्टारलाई दिने भनिएको क्षेतिपूर्तिका विषयमा कार्यसमितिमा एकमत छैन । राष्ट्रिय खेलकुद परिषद् (राखेप) को समेत संलग्नतामा थ्री स्टारलाई १ करोड ५० लाख रुपैयाँ दिन एन्फाका केही जिम्मेवार पदाधिकारीले सहमति गरेपनि त्यसलाई कार्यसमितिबाट पास गर्न कठिनाई उत्पन्न हुने देखिएको छ ।
गत बर्ष एन्फाको गल्तिका कारण छनोट भइसकेको थ्री स्टारले एएफसी कप खेल्न पाएन । त्यसको विरोधमा थ्री स्टारले दोषीमाथि कारवाहीसहित ६ करोड रुपैयाँ क्षेतिपूर्ति माग गरेको थियो । साथै थ्री स्टारले माग पुरा नभएसम्म एन्फाले आयोजना गर्ने कुनै पनि प्रतियोगितामा भाग नलिने घोषणा गरेको थियो । त्यसै अनुसार थ्री स्टारले आफ्नै अध्यक्ष स्वर्गिय ललितकृष्ण श्रेष्ठको स्मृतिमा आयोजित यू १८ प्रतियोगितामा समेत भाग लिएन ।
एन्फा केन्द्रिय सदस्य पंकज नेम्बाङ थ्री स्टारलाई मर्का परेको सबैले मनन गरेको भएपनि दोषीलाई कारवाही नगरी क्षतिपूर्तिको विषय मात्र टुंगिन नसक्ने बताउँछन् । ‘छलफलमा गएपछि केमा सहमति बन्ला त्यो अर्को पाटो भयो । तर, क्षतिपूर्ति दिने अनि दोषीमाथि कारवाही नहुने हो भने यसले कस्तो नजिर बस्ला,’ उनले भने,‘तीन बर्षसम्म लिग नभएपनि कति क्लबले खेलाडीलाई पारिश्रमिक दिइरहेका छन् । भोली उनीहरुले क्षतिपूर्ति दाबी गर्दा दिन सक्ने नसक्ने त्यो विषयमा पनि छलफल आवश्य छ । अर्को थ्री स्टारले क्षतिपूर्ति मात्र मागेको छैन दोषीलाई पनि कारवाही हुनुपर्ने माग राखेको छ ।’
केही समयअघि एन्फाले एपि वानसँग प्रसारण र मार्केटिङको समेत सम्झौता गरिसकेको र त्यसबाट प्राप्त हुने रकम थ्री स्टारलाई किस्तामा दिने विषयमा पनि एन्फामा छलफल भएको सदस्य नेम्बाङले बताए । ‘एपी वानबाट आउने १ करोड ७५ लाख रुपैयाँबाट तीन किस्तामा थ्री स्टारलाई दिने भन्ने विषय पनि छलफलमा उठेको थियो,’ उनले थपे,‘तर, मैले त्यस्तो सम्भव देखिएको छैन । क्षतिपूर्ति दिने एन्फाको श्रोतका विषयमा पनि भोली खोजी हुन सक्छ, त्यसलाई पनि ध्यानमा राखेर निर्णय गर्नुपर्दछ ।’
फेरी पनि बैठकमा दोषीमाथिको कारवाहीको माग आफुले उठाउने नेम्बाङले बताए । ‘अघिल्लो बैठकमा महासचिवको राजीनामा मागिएको थियो । त्यसमा अध्यक्षले सबै जिम्मा म लिन्छु भन्नु भएको छ,’ नेम्बाङले भने,‘अध्यक्षले जिम्मेवारी लिएपछि राजीनामा दिनुपर्दछ । यस्ता गल्ति भविष्यमा नदोहोरियोस भन्नका लागि पनि राजीनामा दिएर नजिर स्थापित गर्नुपर्दछ । गल्ति गर्नेले कारवाही पनि भोग्नु पर्दछ भन्ने आवाज म फेरी पनि उठाउनेछु ।’
एएफसीले डिसेम्बरसम्ममा विशेष साधारण सभा गर्नुपर्ने गाइडलाइन दिएको आफुले जानकारी पाएको जनाउँदै नेम्बाङले त्यसको प्रभाव लिगमा पनि पर्न सक्ने आकलन गरे । ‘क्लबहरुले लिगका लागि तयारी गर्न कम्तिमा दुई महिनाको समय माग्छन् नै । त्यस्तो हुँदा दशै अघि लिग सम्भव देखिन्न,’ उनले अनुमान लगाए,‘त्यसपछि साधारण सभा गर्नुपर्ने भएकोले सायद लिग २०१७ भित्र हुनेमा मलाई शंका छ ।’
एन्फाको वर्तमान कार्यसमितिको अवधि यो बर्ष सकिदैछ । गत बर्ष फिफाले पूर्व अध्यक्ष गणेश थापालाई १० बर्षको प्रतिबन्ध लगाएपछि अध्यक्ष पद रिक्त भएको थियो । एन्फाले गत बर्ष अध्यक्ष र एक उपाध्यक्षको निर्वाचन गरेको थियो । जसमा नरेन्द्र श्रेष्ठ अध्यक्ष र मणी कुँवर उपाध्यक्ष निर्वाचित भएका थिए । अबको साधारण सभाले एन्फाको संसोधित विधान पास गर्दै १७ सदस्यीय कार्यसमितिको पनि चयन गर्नुपर्नेछ ।
साउन ११ कोे बैठकका लागि एन्फाले महिला फुटबल, साफ यू १५ महिला फुटबल, उमेुर समूह, फुटसल प्रतियोगितामा सहभागिता र आयोजना, मिनी पिच र औषधि उपचार खर्चका विषय एजेन्डा तय गरेको छ ।
