काठमाडौं (हाम्रो खेलकुद)– नेपाली राष्ट्रिय टोलीका मिडफिल्डर रोहित चन्दले स्पेनिस ला लिगा टोली इस्पान्योलविरुद्ध मैत्रीपूर्ण खेल खेल्ने मौका पाउने भएका छन् । प्रि सिजनका लागि इन्डोनेसिया भ्रमणमा रहेको इस्पान्योलले रोहितको क्लब पर्सिजा जकार्तासँग भोली मैत्रीपूर्ण खेल्न लागेको छ उनका दाजु रविनले हाम्रो खेलकुद डटकमलाई जानकारी दिएका छन् ।
चार पटकको कोपा डेल रे विजेता इस्पान्योल गत सिजन ला लिगामा आठौं स्थानमा रहँदै अन्त्य गरेको थियो । इस्पान्योलले सन् १९२९, १९४०, २००० र २००६ मा कोपा डेल रे उपाधि जितेको थियो । त्यस्तै टोली १९८७/८८ र २००६/०७ को युइएफएक कप (हालको युरोपा लिग) मा उपविजेता बनेको थियो ।
इस्पान्योलबाट रियल मड्रिड र एसी मिलानका पूर्व गोलकिपर डिएगो लोपेज लगायत भिक्टर सान्चेज र जेरार्ड मोरोनो जस्ता खेलाडी उत्रने बताइएको छ। युरोपियन क्लबविरुद्ध खेल्न लागेको रोहितको यो पहिलो पटक भने होइन। उनले यसअघि डच् र युरोपियन च्याम्पियन एएफसी आयाक्सविरुद्ध पनि मैत्रीपूर्ण खेल खेलिसकेका छन् ।
यो सिजन पर्सिजामा आबद्ध भएयता रोहितले टोलीका लागि २ गोल गरिसकेका छन् । आइतबार मात्र रोहितले गोलमा पर्सिजाले इन्डोनेसिया लिगा १ मा पुसिामिया बोर्निओलाई १–० ले हराएको थियो । पर्सिजाले १५ खेलमा ६ जित, ६ बराबरी र ३ हारका साथ २४ अंक जोडेको छ ।
चोटका कारण झन्डै एक बर्ष मैदान बाहिर रहेर गत बर्षमा उनी लक्ष्मी हुन्डाई मनाङ मस्र्याङ्दीमार्फत फुटबलमा फर्केका थिए । चोटबाट फर्केपछि राष्ट्रिय टोलीमा समेत पुनरागमन गर्दै रोहितले एसियन कप छनोटमा फिलिपिन्स र यमनविरुद्ध खेलिसकेका छन्।
