युठा , अमेरिका (एजेन्सी)– नयाँ क्लबका लागि रोमेलु लुकाकुले गोल गरेपछि प्रि सिजन यात्रामा अमेरिकामा रहेको म्यानचेस्टर युनाइटेडले लगातार दोस्रो सफलता हासिल गरेको छ । रियो टिन्टो रंगशालामा भएको खेलमा रहेको युनाइटेडले रियल साल्ट लेकलाई २–१ ले हराएको थियो ।
गोल गरेपछि युनाइटेडका लुकाकु (बायाँबाट दोस्रो) ।
रियल साल्टले खेलमा अग्रता बनाएपनि त्यसलाई लामो समय जोगाउन सकेन । नयाँ कालो किटका साथ उत्रेको युनाइटेडविरुद्ध घरेलु टोलीले लुइस सिल्भाको गोलबाट २० औं मिनेटमा अग्रता लिएको थियो । तर, त्यसको नौं मिनेटपछि नै हेनरिख मेकिटारियनले बराबरी गोल फर्काए ।
३८ औं मिनेटमा युनाइटेडका लागि लुकाकुले गोल गरे । उनले मेकिटारियनको पासमा गोल गरेका हुन् । क्लबका लागि दोस्रो खेलमा यो उनको पहिलो गोल हो । दुई दिनअघि युनाइटेडले एलए ग्यालेक्सीलाई ५–२ ले हराउँदा लुकाकु दोस्रो हाफमा मैदान प्रवेश गरेका थिए ।
