काठमाडौँ (हाम्रो खेलकुद) – इन्डोनेसियामा नेपाली राष्ट्रिय टोलीका मिडफिल्डर रोहित चन्द सम्मिलित पर्सिजा जाकार्ताले स्पेनिस ला लिगा टोली इस्पान्योलसँगको मैत्रीपूर्ण खेलमा हार व्येहोरेको छ।
हाल नयाँ सिजनको तयारीमा इन्डोनेसियामा प्रि सिजनमा रहेको इस्पान्योलविरुद्ध पर्सिजा जाकार्ता ७-० ले पराजित भएको हो ।
इस्पान्योलले खेलको सातौं मिनेटमा अग्रता लिने क्रममा २५ वर्षीय स्ट्राइकर जेरार्ड मोरेनोले गोल गरेका थिए। त्यस्तै इस्पान्योलमा यसै सिजन आएका ३० वर्षीय सेन्टर मिडफिल्डर ग्रानेरोले पहिलो हाफमा दुइ गोल गरे। रियल म्याड्रिडका पूर्व खेलाडी होजे म्यानुएल जुराडो र डेभिड लोपेजको गोलमा पाहुना टोली पहिलो हाफमा ५-० ले अगाडी रह्यो । दोस्रो हाफमा आरोन मार्टिन र पापाकौली डिओपले १/१ गोल थपे ।
इन्डोनेसियाको लिगमा पर्सिजाकालागि नियमित सुरुवात गर्दै आएका रोहित यस खेलमा भने ७८ मिनेटमा मैदान प्रवेश गरेका थिए।
